Monday, January 10, 2005

குர்பானி - அறுத்து பலியிடுதல், சட்டங்கள். பகுதி 2

"ஹஜ்" பெருநாளை நெருங்கிக் கொண்டிருக்கும் முஸ்லிம்களுக்கு. குர்பானி - அறுத்து பலியிடுதலின் சட்ட விளக்கங்கள். ஆக்கம்: நண்பர் M.I. முஹம்மது சுலைமான்.
பகுதி:2

குர்பானி பிராணியை அறுக்கும் முன் கவனிக்க வேண்டியவை:
பிராணியை அறுக்கும் முன் கத்தியை கூர்மையாக்கி வைத்துக்கொள்ள வேண்டும். கூர்மையற்ற கத்தியினால் அறுத்து பிராணியை சித்திரவதைச் செய்யக் கூடாது.

எல்லா உயிரினங்களின் மீதும் நல்ல முறையில் நடந்து கொள்வதை அல்லாஹ் கடமையாக்கியுள்ளான். நீங்கள் (கிஸாஸ் - பழிக்குப் பழி) வாங்கும்போது கொலை செய்தால் அழகிய முறையில் கொலை செய்யுங்கள்! நீங்கள் பிராணிகளை அறுத்தால் அழகிய முறையில் அறுங்கள். உங்கள் கத்தியை நீங்கள் கூர்மையாக்கிக் கொள்ளுங்கள்! (விரைவாக) அறுப்பதன் மூலம் அதற்கு நிம்மதியைக் கொடுங்கள்! என்று நபி(ஸல்) அவர்கள் கூறினார்கள். (அறிவிப்பவர்: ஹிதாத் இப்னு அவ்ஸ்(ரலி) ஆதார நூல்கள்: முஸ்லிம், அபூதாவூத், இப்னுமாஜா (3170)

ஆயிஷா கத்தியைக் கொண்டு வா! அதைக் கல்லில் கூர்மையாக்கு! என்று நபி(ஸல்) அவர்கள் கூறினார்கள். (அறிவிப்பவர்: ஆயிஷா (ரலி), நூல்கள்: முஸ்லிம், அபூதாவூத், அஹ்மத்).

குர்பானி கொடுக்கும்போது குடும்பத்தினர் அனைவரும் கட்டாயம் வந்து நிற்க வேண்டும் என்பதற்கு ஆதாரப்பூர்வமான ஹதீஸ்கள் எதுவுமில்லை. இவ்வாறு குர்பானி கொடுக்கும்போது குடும்பத்தினர் அனைவரும் கட்டாயம் வந்து நிற்க வேண்டும் என்று ஆதாரப்பூர்வமான ஹதீஸ்கள் எதுவும் இல்லாவிட்டாலும், குடும்பத்தினர்கள் வந்து நின்றால் இது தவறாகாது. நபி(ஸல்) அவர்கள் குர்பானி கொடுத்தபோது அன்னை ஆயிஷா (ரலி) அவர்கள் நின்றுள்ளார்கள். இதற்குரிய ஹதீஸை முன்னரே குறிப்பிட்டுள்ளோம்.

மேலும் குர்பானி பிராணியை கிப்லாவை முன்னோக்க வைத்து குர்பானி கொடுக்க வேண்டும் என்பதற்கு ஆதாரப்பூர்வமான ஹதீஸ்கள் இல்லை. இது சம்பந்தமாக ஆயிஷா (ரலி) அவர்கள் வழியாக ஒரு செய்தி அறிவிக்கப்பட்டுள்ளது என்றும் அது பலவீனமானது என்றும் பைஹகீ (ரஹ்) அவர்கள் குறிப்பிடுகிறார்கள். எனவே எந்தத் திசையில் வைத்தும் குர்பானி கொடுக்கலாம்.

குர்பானி கொடுக்கும்போது கூற வேண்டியவை:
பிராணியை அறுக்கும்போதே 'வஜ்ஜஹத்து வஜ்ஹிய லில்லதீ" என்ற துஅவை சிலர் ஓதுகின்றனர். இதுபற்றி அபூதாவூத், பைஹகீ, இப்னுமாஜா ஆகிய நூல்களில் ஒரு ஹதீஸ் இடம்பெறுகிறது. எனினும் இந்த ஹதீஸ் பலவீனமானதாகும். இதன் அறிவிப்பாளர் வரிசையில் அபூ அய்யாஸ், முஹம்;மது இப்னு இஸ்ஹாக் ஆகிய இரு பலவீனமான அறிவிப்பாளர்கள் இடம்பெறுகின்றனர். எனவே இதை ஓத வேண்டிய அவசியமில்லை.

அறுக்கும்போது 'பிஸ்மில்லாஹி வல்லாஹு அக்பர் (அல்லாஹ்வின் பெயரால் அறுக்கிறேன். அல்லாஹ் பெரியவன்) என்றே கூற வேண்டும்.

நபி (ஸல்) அவர்கள் கருப்பும், வெள்ளையும் கலந்த இரண்டு கொம்புள்ள ஆடுகளை குர்பானி கொடுத்தார்கள். அதைத் தன் கையால் அறுத்தார்கள் அப்போது பிஸ்மில்லாஹ்வும் தக்பீரும் கூறினார்கள். (அறிவிப்பவர்: அனஸ்(ரலி), நூகள்: புகாரி(5565) முஸ்லிம்).

முஸ்லிமின் மற்றொரு அறிவிப்பில் 'பிஸ்மில்லாஹி வல்லாஹு அக்பர்" என்ற வாசகம் தெளிவாகக் கூறப்பட்டுள்ளது. நபி(ஸல்) அவர்கள் தங்கள் கரங்களாலேயே அறுத்துள்ளதால், குர்பானி கொடுப்பவர் அறுப்பதே சிறந்ததாகும்.

தொழுத பின்பே அறுக்க வேண்டும்:
ஹஜ்ஜுப் பெருநாள் தொழுகை முடிந்தபின்பே குர்பானி கொடுக்க வேண்டும். தெரியாமல் தொழுகைக்கு முன் அறுத்துவிட்டால் தொழுத பின் மற்றொரு பிராணியை அறுக்க வேண்டும்.

இன்றைய நாளில் நாம் முதலாவது செய்வது தொழுகையாகும். பிறகு நாம் (வீட்டிற்கு) திரும்பிச் சென்று குர்பானி கொடுப்போம். யார் இப்படி நடந்து கொள்வாரோ அவர் நமது வழியில் நடந்து கொண்டார். யார் (தொழுமுன்) அறுத்தாரோ அவர் தன் குடும்பத்திற்காக மாமிசத்தை முற்படுத்திக் கொண்டார். அவருக்கு குர்பானியில் (நன்மை) எதுவும் கிடையாது என்ற நபி(ஸல்) அவர்கள் கூறினார்கள். அப்போது அபூதர்தா இப்னு நியார்(ரலி) அவர்கள் (தொழுமுன்) அறுத்து விட்டிருந்தார். அவர் (நபி(ஸல்) அவர்களிடத்தில்) என்னிடத்தில் 'முஸின்னாவை" விட சிறந்த ஆறுமாதக் குட்டி உள்ளது. (அதைக் குர்பானி கொடுக்கலாமா?) என்றார். அதை முன் அறுத்ததற்கு இதை பகரமாக்குவீராக! (அறுப்பீராக!) எனினும் உமக்குப் பிறகு வேறு எவருக்கும் இது (குர்பானி கொடுக்க) அனுமதியில்லை என்று நபி(ஸல்) அவர்கள் கூறினார்கள். (அறிவிப்பவர்: பரா(ரலி), நூல்கள்: புகாரி (5560), முஸ்லிம்.

பெண்கள் அறுக்கலாமா? :
பெண்கள் அறுப்பதற்கு எவ்வித தடையும் ஹதீஸ்களில் இல்லை. மேலும் நபி(ஸல்) அவர்கள், ஒரு பெண் அறுத்ததை அங்கீகரித்துள்ளார்கள்.

ஒரு பெண்மணி (கூர்மையான) கல்லால் ஆட்டை அறுத்து விட்டார். இது பற்றி நபி(ஸல்) அவர்களிடம் கேட்கப்பட்ட போது அதை சாப்பிடும்படி கட்டளையிட்டார்கள். (அறிவிப்பவர்: கஅபு இப்னு மாலிக் (ரலி), நூல்: புகாரி (5504).

எத்தனை நாட்கள் கொடுக்கலாம்?:
ஹஜ்ஜுப் பெருநாள் அன்றும், அதற்கு பிறகுள்ள மூன்று நாட்கள் வரை குர்பானி கொடுக்கலாம்.

தஷ்ரிக்குடைய நாட்கள் (துல்ஹஜ் 11, 12, 13) அனைத்தும் அறுப்பதற்குரியதாகும் என்று நபி(ஸல்) அவர்கள் கூறினார்கள். (அறிவிப்பவர்: ஜுபைர் இப்னு முத்இம்(ரலி), நூல்கள்: தாரகுத்னி, இப்னு ஹிப்பான், அஹ்மத்).

இந்த ஹதீஸைப் பற்றி ஹாபிழ் இப்னு ஹஜர்(ரஹ்) அவர்கள் ஃபத்ஹுல் பாரியில் அஹ்மதின் அறிவிப்பு தொடர்பு அறுந்ததாகும். தாரகுத்னியில் தொடர்புள்ளதாக அறிவிக்கப்பட்டுள்ளது. அதன் அறிவிப்பாளார்கள் நம்பகமானவர்கள் என்று குறிப்பிடுகிறார்கள்.

எத்தனை பிராணிகள் கொடுக்கலாம்:
பெருமையை நாடாமல் ஏழைகளின் தேவைகளைக் கருதி எத்தனைப் பிராணிகளை வேண்டுமானாலும் குர்பானி கொடுக்கலாம். மாமிசம் வீண் விரயமாகாமல் இருக்க வேண்டும்.

நபி(ஸல்) அவர்கள் காலத்தல் குர்பானி கொடுப்பது எவ்வாறு அமைந்திருந்தது என்று அபூ அய்யூப்(ரலி) அவர்களிடம் நான் கேட்டேன். அதற்கவர்கள் 'ஒருவர் தமக்காகவும், தம் குடும்பத்தினருக்காகவும் ஒரு ஆட்டையே குர்பானி கொடுப்பார். அவர்களும் உண்பர். பிறருக்கும் உண்ணக் கொடுப்பார்கள். மக்கள் பெருமையடிக்க ஆரம்பித்து நீர் பார்க்கக்கூடிய இந்த நிலை ஏற்பட்டுவிட்டது என்று கூறினார்கள். (அறிவிப்பவர்: அதா இப்னு யஸார். நூல்கள்: திர்மிதீ, இப்னுமாஜா (3147), தப்ரானீ.

இந்த ஹதீஸ் ஒருவர் தன் குடும்பத்திற்காக ஒரு ஆட்டைக் குர்பானி கொடுத்தால் போதுமானது என்றும், பெருமைக்காக அதிகம் கொடுக்கக்கூடாது என்றே கூறுகிறது. நபி(ஸல்) அவர்கள் இரண்டு ஆட்டைக் குர்பானி கொடுத்ததையும் நாம் முன்னர் குறிப்பிட்டுள்ளோம். நபி(ஸல்) அவர்கள் ஹஜ்ஜில் 63 ஒட்டகங்களைத் தன் கரத்தால் குர்பானி கொடுத்துள்ளார்கள். ஜாபர் (ரலி) அறிவிக்கும் இந்தச் செய்தி முஸ்லிமில் இடம் பெற்றுள்ளது. எனவே ஒன்றுக்கு மேல் பிராணி கொடுப்பதற்கு எந்தத் தடையுமில்லை.

பங்கிடுதல் குர்பானி கொடுத்த பிராணியின் மாமிசத்தை மூன்று பங்கு வைத்து ஒரு பங்கு தனக்காகவும், மற்றொன்று சொந்தக்காரர்களுக்கும், அடுத்தது ஏழைகளுக்கும் கொடுக்க வேண்டும்" என்று கூறுவதற்கு ஆதாரப்பூர்வமான எந்த ஹதீஸும் இல்லை. சொந்தம், ஏழை, யாசிப்பவர்கள் இப்படி யாருக்கும் எவ்வளவு வேண்டுமானாலும் கொடுக்கலாம். நிர்ணயம் எதுவுமில்லை.

'அவற்றிலிருந்து (குர்பானி பிராணியிலிருந்து) நீங்களும் உண்ணுங்கள்! (வறுமையிலும் கையேந்தாமல், இருப்பதைக் கொண்டு) திருப்தியாய் இருப்போருக்கும், யாசிப்போருக்கும் உண்ணக் கொடுங்கள்!" (அல்-குர்ஆன் அத்தியாயம் 22 ஸுரத்துல் ஹஜ் 36வது வசனத்தின் ஒரு பகுதி)

இந்த வசனத்தில் அல்லாஹ் இத்தனை சதவிகிதம் கொடுக்க வேண்டுமென கட்டளையிடவில்லை. பொதுவாக தர்மம் செய்யுங்கள் என்றே கூறுவதால் எவ்வளவு வேண்டுமானாலும் கொடுக்கலாம்.

நபி(ஸல்) அவர்கள் நூறு ஒட்டகங்களைக் குர்பானி கொடுத்து அதை அனைத்தையும் பங்கிட்டு ஏழைகளுக்கு வழங்குமாறு அலீ (ரலி) அவர்களுக்கு கட்டளையிட்ட செய்தி புகாரியில் (1717, 1718) பதிவு செய்யப்பட்டுள்ளது. முஸ்லிமின் அறிவிப்பில் ஒவ்வொரு ஒட்டகையிலும் ஒரு துண்டு எடுத்து அதைச் சமைத்துச் சாப்பிட்டதாக குறிப்பிடப்பட்டுள்ளது. எனவே குறிப்பிட்ட அளவில்லாமல் எவ்வளவு வேண்டுமானாலும் தர்மமாகக் வழங்கலாம்.

குர்பானி மாமிசத்தை நிராகரிப்பவர்களுக்கு (காஃபிர்களுக்கு)க் கொடுக்க எந்தத் தடையுமில்லை. குர்ஆனின் 22வது அத்தியாயம் ஸுரத்துல் ஹஜ்ஜின் 36வது வசனத்தில் பொதுவாக ஏழைகள் என்றும், யாசிப்பவர்கள் என்றும்தான் குறிப்பிடப்பட்டுள்ளது.

தோல்:
குர்பானி பிராணியின் தோலை, பிராணிகளை வெட்டி, உரித்தவருக்குக் கூலியாகக் கொடுக்கக் கூடாது. இதை தர்மமாக ஏழைகளுக்கு வழங்க வேண்டும்.

ஒரு ஒட்டகத்தைக் குர்பானி கொடுக்கும் பொறுப்பை என்னிடம் நபி(ஸல்) அவர்கள் ஒப்படைத்தார்கள். அதன் மாமிசத்தையும், தோலையும், அதன் மீது கிடந்த (கயிறு, சேனம் போன்றவை) களையும் தர்மமாக வழங்குமாறும் உரிப்பவருக்குக் கூலியாக அதில் எதனையும் வழங்கக் கூடாது என்றும் எனக்குக் கட்டளையிட்டனர். அதற்கானக் கூலியை நாங்கள் தனியாகக் கொடுப்போம். (அறிவிப்பவர்: அலி(ரலி), நூல்கள்: புகாரி (1716), முஸ்லிம்).

தோலை தர்மமாக வழங்கச் சொன்னதன் காரணமென்ன என்பதைச் சிந்தித்தால் 'பெருநாள் அன்று ஏழைகள் மகிழ்ச்சியாக இருக்க வேண்டும்" என்பதற்கே நபி(ஸல்) அவர்கள் தர்மம் செய்ய வேண்டும் என்று கூறியிருப்பார்கள் என்பதை விளங்கலாம். எனவே இதைக் கருத்தில் வைத்து நமது ஊர்களில் உள்ள ஏழைகளுக்கேத் தோலை வழங்கி அவர்களை மகிழ்ச்சியாக வாழ வைக்க வேண்டும். மதரஸா, மற்றும் தொண்டு நிறுவனங்களுக்கு இதை வழங்குவதை தவிர்ப்பது நன்று. தோல் அல்லாத மற்ற பணத்தைத் மேற்படி தொண்டு நிறுவனங்களுக்கு வழங்குவது நல்லது. மதரஸா மற்றும் தொண்டு நிறுவனங்கள் மொத்தமாகத் தோலை வாரிச்சென்று விடும்போது உள்ளுரில் உள்ள ஏழைகள் பாதிக்கப்படுவதை நாம் உணர வேண்டும்.

ஹாஜிகள் தனியாகக் குர்பானி கொடுக்க வேண்டுமா? :
ஹஜ்ஜுக்குச் சென்று துல்ஹஜ்ஜுப் பிறை பத்தாம் நாள் மினாவில் ஹாஜிகள் குர்பானி கொடுப்பார்கள். இவ்வாறு குர்பானி கொடுப்பவர்கள் தனியாக உள்ளுரில் குர்பானி கொடுக்க வேண்டுமா? இவ்வாறு கொடுக்க வேண்டிய அவசியமில்லை என்பதை நபி(ஸல்)அவர்களின் வழிமுறையிலிருந்து நாம் அறிந்து கொள்ளலாம். ஏனெனில் நபி(ஸல்) அவர்களோ, அவர்களோடு வாழந்திருந்த அவர்களின் மற்றத் தோழர்களோ இவ்வாறு குர்பானி கொடுத்ததாக எந்த ஹதீஸ{ம் இல்லை. மேலும் நபி(ஸல்) அவர்கள் அவ்வாறு கொடுக்குமாறு கட்டளையிடவுமில்லை. எனவே ஹாஜிகள் மினாவில் கொடுக்கக் கூடிய குர்பானியே போதுமானதாகும்.

இறந்துவிட்டவர்கள் சார்பாக குர்பானி:
இறந்துவிட்டவர்கள் சார்பாக குர்பானி கொடுப்பதற்கு ஆதாரப்பூர்வமான ஹதீஸ்கள் எதுவுமில்லை. இறந்துவிட்டவர்கள் சார்பாக குர்பானி கொடுப்பதற்கு ஆதாரமாக எடுத்துக் காட்டப்படும் ஹதீஸ்கள் யாவும் பலவீனமானதாகவே உள்ளது. மேலும் நபி(ஸல்) அவர்கள் அறிவித்ததாக அபூ ஹுரைரா (ரலி) அவர்கள் அறிவிக்கும் கீழ்க்கண்ட ஹதீஸ் இறந்துவிட்டவர்கள் சார்பாக குர்பானி கொடுப்பதை தடுக்கிறது.

'ஆதமின் மகன் இறந்துவிட்டால் மூன்று விஷயத்தைத் தவிர மற்ற எல்லாத் தொடர்புகளும் துண்டிக்கப்பட்டு விடுகின்றன. அவை 1. நிரந்தர தர்மம், 2. பயன்தரும் கல்வி, 3. தந்தைக்காகச் துஆச் செய்யும் நல்ல குழந்தை என்று நபி(ஸல்) அவர்கள் கூறினார்கள். (அறிவிப்பவர்: அபூ ஹுரைரா (ரலி), நூல்: முஸ்லிம்).

இறந்து விட்டவர்களுக்கு நன்மை சேர்க்கும் வழி மேற்கண்ட ஹதீஸில் குறிப்பிடப்பட்ட அந்த மூன்று செயல்கள்தாம். இவை அல்லாத வேறு வழிகளில் நன்மை சேரும் என்றால் அதை நபி(ஸல்) அவர்கள் தெளிவாகச் சொல்லியிருப்பார்கள். மேலும் இறந்தவர்கள் சார்பாக குர்பானி கொடுக்கும் விஷயத்தில் நபி(ஸல்) அவர்கள் குர்பானி கொடுக்கும்படி கூறவில்லை. ஸஹாபாக்களும் கொடுத்ததில்லை.

நபி(ஸல்) அவர்கள் காலத்தில் ஒருவர் தனக்காகவும், தன் குடும்பத்தினருக்காகவும் ஒரு ஆட்டையே குர்பானி கொடுப்பர் என்று அபூ அய்யூப் (ரலி) அவர்களின் கூற்று (திர்மிதீ, இப்னுமாஜா) நபித்தோழர்கள் தங்கள் குடும்பத்திற்காக மட்டுமே குர்பானி கொடுத்துள்ளார்கள். இறந்தவர்களுக்காக குர்பானி கொடுக்கவில்லை என்பதைத் தெளிவாக எடுத்துக் காட்டுகிறது.

இறந்தவர்கள் சார்பாக குர்பானி கொடுக்கலாம் என்று கூறக்கூடியவர்கள் எடுத்துவைக்கும் ஹதீஸ்கள் யாவும் ஆதாரப்பூர்வமானது அல்ல.குர்பானியின் மூலம் அல்லாஹ் எதிர்பார்ப்பது இறையச்சம் மட்டுமே. இந்த இறையச்சத்தை, அவரவர் கொடுக்கும்போதுதான் வெளிப்படும். இறந்தவருக்காக நாம் கொடுப்பது அவர்களின் இறையச்சத்தை வெளிப்படுத்தாது.
( அல்லாஹ் மிக அறிந்தவன் )

குர்பானி - அறுத்து பலியிடுதல், சட்டங்கள். பகுதி 1

"ஹஜ்" பெருநாளை நெருங்கிக் கொண்டிருக்கும் முஸ்லிம்களுக்கு. குர்பானி - அறுத்து பலியிடுதலின் சட்ட விளக்கங்கள். ஆக்கம்: நண்பர் M.I. முஹம்மது சுலைமான்.

'.. அவர் கூறினார்: 'நிச்சயமாக நான் என்னுடைய இறைவனிடம் செல்பவன். திட்டமாக அவன் எனக்கு நேர் வழியைக் காண்பிப்பான். 'என்னுடைய இறைவா! நீ எனக்கு ஸாலிஹான ஒரு நன்மகனைத் தருவாயாக" (என்று பிரார்த்தித்தார்). எனவே, நாம் அவருக்கு பொறுமைசாலியான ஒரு மகனைக் கொண்டு நன்மாராயம் கூறினோம்.

பின் (அம்மகன்) அவருடன் நடமாடக்கூடிய (வயதை அடைந்த) போது அவர் கூறினார்: "என்னருமை மகனே! நான் உன்னை அறுத்து பலியிடுவதாக நிச்சயமாகக் கனவு கண்டேன். இதைப்பற்றி உம் கருத்து என்ன என்பதைச் சிந்திப்பீராக!" (மகன்) கூறினார்: 'என்னருமைத் தந்தையே! நீங்கள் ஏவப்பட்டபடியே செய்யுங்கள். அல்லாஹ், நாடினால் - என்னை நீங்கள் பொறுமையாளர்களில் நின்றுமுள்ளவனாகவே காண்பீர்கள்.

ஆகவே, அவ்விருவரும் (இறைவன் கட்டளைக்கு) முற்றிலும் வழிப்பட்டு, (இப்ராஹீம்) மகனைப் பலியிட முகம் குப்புறக் கிடத்திய போது, நாம் அவரை, 'யா இப்ராஹீம்!" என்றழைத்தோம். 'திடமாக நீர் (கண்ட) கனவை மெய்ப்படுத்தினீர். நிச்சயமாக நன்மை செய்வோருக்கு நாம் இவ்வாறே கூலி கொடுக்கிறோம். நிச்சயமாக இது தெளிவான ஒரு பெருஞ்சோதனையாகும். ஆயினும், ஒரு மகத்தான பலியைக் கொண்டு அவருக்குப் பகரமாக்கினோம். இன்னும் அவருக்காகப் பிற்காலத்தவருக்கு (ஒரு ஞாபகார்த்தத்தை) விட்டு வைத்தோம்."

மேற்கண்ட இறை வசனங்கள் அருள்மறை குர்ஆனின் 37வது அத்தியாயம் ஸுரத்துஸ் ஸஃப்ஃபாத் 99ஆம் வசனம் முதல் 108ஆம் வசனங்களாகும். நபி இப்றாஹீம்(அலை) அவர்களின் மகன் இஸ்மாயீல்(அலை) அவர்களை அறுத்துப் பலியிடுமாறு அல்லாஹ் கனவின் மூலம் நபி இப்றாஹீம்(அலை) அவர்களுக்குக் கட்டளையிட்டான். அல்லாஹ்வின் கட்டளையை நிறைவேற்ற தன் மகனை அழைத்துப் பலியிட நெருங்கியபோது அல்லாஹ் அதைத் தடுத்து ஒரு ஆட்டைப் பலியிடுமாறு கட்டளையிட்டான். நபி இப்ஹாஹீம்(அலை) அவர்களின் இந்த தியாகத்தை நினைவு கூறும் வண்ணம் மற்ற அனைவரும் பிராணியை பலியிட வெண்டுமென அல்லாஹ் கட்டளையிடுகிறான்.

நபி இப்றாஹீம்(அலை) அவர்கள் எப்படி தன் மகனைக் கூட அல்லாஹ்விற்காக பலியிட முன்வந்தார்களோ அதைப்போன்று நாமும் முன்வருவோம் என்பதை எடுத்துக் காட்டும் வண்ணமே 'குர்பானி" கொடுக்கிறோம். இந்த குர்பானி கொடுப்பதன் நோக்கம் இறையச்சமேத் தவிர, வேறில்லை.'

குர்பானியின் மாமிசமோ, அவற்றின் இரத்தமோ அல்லாஹ்வை அடைவதில்லை. எனினும் உங்களின் இறையச்சமே அவனை அடைகிறது" (அத்தியாயம் 22 ஸுரத்துல் ஹஜ்ஜின் 37வது வசனம்).

மேற்கண்ட வசனம் குர்பானியின் உண்மையான நோக்கத்தைத் தெளிவாக விளக்குகிறது. குர்பானி பெருமைக்காகவோ, அல்லது வேறு காரணத்திற்காகவோ செய்யப்படுமானால் குர்பானியின் நன்மையை எள்ளளவும் அல்லாஹ்விடம் பெற முடியாது.

மிக உயர்ந்த நோக்கத்திற்காக உருவாக்கப்பட்ட இந்த குர்பானியை நபி(ஸல்) அவர்கள் தன் வாழ்நாளில் கொடுத்து வந்ததை நபிமொழி தொகுப்புக்களில் காண முடிகிறது. அருள்மறை குர்ஆனின் 108வது அத்தியாயம் ஸுரத்துல் கவ்ஸரின் 2வது வசனத்தில் அல்லாஹ் கூறுகிறான்:'

எனவே, உம் இறைவனுக்கு நீர் தொழுது, குர்பானியும் கொடுப்பீராக!". (அத்தியாயம் 108 ஸுரத்துல் கவ்ஸர் - 2வது வசனம்)

மேற்கண்ட இறைவசனம் குர்பானியின் அவசியத்தையும், நபி(ஸல்) அவர்களை குர்பானி கொடுக்கும்படி கட்டளையிடுவதையும் கூறுகிறது.

யார் மீது கடமை?.'
யார் மீது ஜகாத் கடமையோ அவர்மீது குர்பானி கடமை" என்று சிலர் கூறுவதற்கு எந்த ஆதாரமும் கிடையாது. அல்லாஹ்வோ அல்லது அல்லாஹ்வின் தூதர் அண்ணல் நபி(ஸல்) அவர்களோ இப்படிக் கூறவில்லை என்பதால் இதனை ஏற்க முடியாது. எவரிடம் அன்றைய செலவு போக, கடன் இல்லாமல் கூடுதலாக பணம் இருக்குமானால், அவர் குர்பானி கொடுக்க வேண்டும். கடன் உள்ளவர்கள் முதலில் கடனையே நிறைவேற்ற வேண்டும். ஏனெனில் அல்லாஹ்வின் பாதையில் கொல்லப்பட்டவர்கள் (ஷஹீத்) கூட கடன் பெற்றிருந்தால் அல்லாஹ் அதனை மன்னிப்பதில்லை என்ற அல்லாஹ்வின் தூதர் அண்ணல் நபி(ஸல்) அவர்கள் கூறியுள்ளார்கள். (ஆதார நூல்: முஸ்லிம்).

எனவே கடன் வாங்கியோ, அல்லது கடன் இருக்கும்போதோ அதை நிறைவேற்றாமல் குர்பானி கொடுக்கக்கூடாது.

அல்லாஹ்வின் தூதரே! நான் கடன் பெற்று குர்பானி கொடுக்கவா? என்று கேட்டேன். அதற்கு நபி(ஸல்) அவர்கள் 'ஆம்" இதுவும் நிறைவேற்றப்பட வேண்டிய கடனாகும் என்று கூறினார்கள். (அறிவிப்பவர்: ஆயிஷா(ரலி). நூல்: பைஹகீ (190021).

கடன் வாங்கி குர்பானி கொடுக்கலாம் என்று இந்த ஹதீஸ் ஆதாரபூர்வமானது அல்ல! இது தொடர்பு அறுந்த பலவீனமாக செய்தியாகும். இதை இமாம் பைஹகீ அவர்களே இந்த ஹதீஸின் தொடரில் இறுதியில் குறிப்பிடுகிறார்கள். இந்த செய்தியின் இரண்டாவது அறிவிப்பாளர் ஹுஸைர் இப்னு அப்துர்ரஹ்மான் என்பவர் ஆயிஷா (ரலி) இடமிருந்து எதையும் செவியுற்றதில்லை.

குர்பானி கொடுப்பவர் பேண வேண்டியவை:
குர்பானி கொடுக்க நாடியவர் துல்ஹஜ் பிறை ஒன்று முதல் குர்பானி கொடுக்கும் வரை நகம், முடி இவற்றில் எவற்றையும் வெட்டக்கூடாது.

நீங்கள் குர்பானி கொடுப்பவராக இருந்து துல்ஹஜ் பிறையைக் கண்டால் குர்பானி கொடுக்கும்வரை தனது முடியை, நகத்தை வெட்ட வேண்டாம் என்று நபி(ஸல்) அவர்கள் கூறினார்கள். (அறிவிப்பவர்: உம்மு ஸலாமா (ரலி), ஆதார நூல்கள்: முஸ்லிம், நஸயீ, அபூதாவூத், இப்னுமாஜா (3149), பைஹகீ (19043).

குர்பானி பிராணிகள்:
ஒட்டகம், மாடு, ஆடு இம்மூன்றும் குர்பானி கொடுக்கத் தகுதியான பிராணிகள். இதைத் தவிர வேறு எதையும் குர்பானி கொடுக்கக் கூடாது அல்லாஹ்வின் தூதர் அண்ணல் நபி(ஸல்) அவர்கள் ஒட்டகம், மாடு, ஆடு ஆகியவற்றை குர்பானி கொடுத்ததாக ஆதாரபூர்வமான ஹதீஸ்கள் கூறுகின்றன. எனவே இம்மூன்று பிராணிகள் மட்டுமே குர்பானி பிராணிகளாகும். எருமை மாட்டை குர்பானி கொடுக்கலாமா? என்பதில் அறிஞர்களிடையே கருத்து வேறுபாடு நிலவுகின்றது. நபி(ஸல்) அவர்கள் வாழ்ந்த பூமியில் எருமை மாடு இல்லாத காரணத்தால் குர்ஆன், ஹதீஸில் இதைப்பற்றித் தெளிவாகக் குறிப்பிடவில்லை. எனவே சிலர் ஹதீஸ்களில் இல்லாததை குர்பானி கொடுக்கக் கூடாது என்கின்றனர். இன்னும் சிலர் எருமை மாடு, மாட்டு இனத்தில் உள்ளதால் பசு, காளையை எப்படிக் குர்பானி கொடுக்கலாமோ அதைப்போன்று, எருமை மாட்டையும் குர்பானி கொடுக்கலாம் என்கின்றனர்.

இதில் தெளிவாக முடிவெடுக்கக்கூடிய அளவு ஆதாரங்கள் இல்லாததால் பேணுதலின் அடிப்படையில் எருமை மாட்டை குர்பானி கொடுக்காமல் இருப்பதே சிறந்தது. (அல்லாஹ் மிக அறிந்தவன்).

குர்பானி பிராணிகளின் தன்மைகள்:
குர்பானி பிராணிகள் நல்ல திடகாத்திரமானதாகவும், ஆரோக்கியமானதாகவும் இருக்க வேண்டும். பொதுவாக எந்தக் குறையும் இல்லாததாக இருக்க வேண்டும்.

தெளிவாகத் தெரியும் நொண்டி, தெளிவாகத் தெரியும் கண்பார்வைக் குறைவு, தெளிவாகத் தெரியும் நோய், எலும்பில் சதைப்பற்று இல்லாத மெலிவு ஆகிய குறைபாடுகளுடையவற்றைக் குர்பானி கொடுக்கக் கூடாது என்று நபி (ஸல்) அவர்கள் கூறினார்கள். (அறிவிப்பவர்: பரா (ரலி), நூல்கள்: திர்மிதி (1530), அபூதாவூத், நஸயீ, இப்னுமாஜா (3144).

பிராணிகளின் கண்களையும், காதுகளையும், கவனித்துத் தேர்வு செய்யுமாறு நபி(ஸல்) அவர்கள் எங்களுக்குக் கட்டளையிட்டார்கள். சிறிதளவு காது வெட்டப்பட்டவை, காது கிழிக்கப்பட்டவை, காதில் துவாரமிடப்பட்டவை ஆகியவற்றைக் குர்பானி கொடுக்கக்கூடாது என்று நபி(ஸல்) அவர்கள் கட்டளையிட்டார்கள். (அறிவிப்பவர்: அலி(ரலி), ஆதார நூற்கள்: திர்மிதீ 1532, அஹ்மத், அபூதாவூத், நஸயீ).

நபி(ஸல்) அவர்கள் 'கொம்புள்ள கருப்பு நிறத்தால் நடக்கக்கூடிய, கறுப்பு நிறத்தால் அமரக்கூடிய, கறுப்பு நிறத்தால் பார்க்கக் கூடிய (அதாவது கால், மூட்டுக்கால், கண் பகுதி ஆகியவை கறுப்பு நிறமுடைய) ஆட்டை குர்பானி கொடுக்க வாங்கி வருமாறு கட்டளையிட்டார்கள். (அறிவிப்பவர்: ஆயிஷா (ரலி), நூல்கள்: முஸ்லிம், அபூதாவூத், அஹ்மத்).

இந்த ஹதீஸின் அடிப்படையில் ஆடு வாங்குபவர்கள் கொம்புள்ள, முகம், மூட்டுக்கால், கண்பகுதி கருப்பு நிறமுடையதாக வாங்குவது சிறப்புக்குரியதாகும்.

'மதீனாவில் குர்பானி பிராணிகளை நாங்கள் கொழுக்க வைப்போம். (ஏனைய) முஸ்லிம்களும் கொழுக்க வைப்பார்கள்." (அறிவிப்பவர்: அபூஉமாமா (ரலி) நூல்: புகாரி, (தஃலீக்).

இந்த ஹதீஸை புகாரி இமாம் அவர்கள் அறிவிப்பாளர் வரிசையில்லாமல் பதிவு செய்துள்ளார்கள். ஹாபிழ் இப்னு ஹஜர் (ரஹ்) அவர்கள் தனது ஃபத்ஹுல் பாரி என்ற நூலில் இந்தச் செய்தி அபூநுஜம் அவர்களின் 'அல்முஸ்தத்ரக்" என்ற நூலில் அறிவிப்பாளர் வரிசையுடன் இடம் பெறுவதாகக் குறிப்பிடுகிறார்கள்.

எனவே குர்பானி பிராணிகளை முன்கூட்டியே வாங்கி நல்ல தீனி போட்டுக் கொழுக்க வைக்கலாம்.

குர்பானி பிராணிகள் வாங்கும்போது நல்ல தரமான உயர் ரகமானதை வாங்குவது நன்மையை அதிகரித்துத் தரும். அல்லாஹ் கூறியுள்ளான் என்பதற்காக ஏழைகளுக்கு வழங்க வேண்டும். அவர்கள் உயர்தரமான இறைச்சியை சாப்பிட வேண்டும் என்று எண்ணி அதிகவிலை கொடுத்து வாங்கவதற்கு கூடுதலான நன்மைகள் உண்டு என்பதை கீழ்க்காணும் ஹதீஸ்களை கவனித்தால் விளங்கும்.

சிறந்த அமல் எது? என்று நபி(ஸல்) அவர்களிடம் கேட்டேன்: 'அல்லாஹ்வை நம்புவதும், அவனுடைய பாதையில் போர்புரிவதுமாகும்" என்று கூறினார்கள். அடிமை விடுதலை செய்வதில் சிறந்தது எது? என்று கேட்டேன். எஜமானனால் விருப்பமள்ள அதிக விலையுள்ள அடிமை என பதிலளித்தார்கள். (அறிவிப்பவர்: அபூதர் (ரலி), ஆதார நூல்: புகாரி (2518).

'நீ தூய்மையானதும் 'தன்யீம்" என்ற இடத்திற்குச் சென்று இஹ்ராம் அணிந்து கொள்! பிறகு இந்த இடத்தில் என்னை சந்தி! (இப்படிச் செய்வதினால்) உன்னுடைய செலவுக்கும், உன் கஷ்டத்திற்கும் ஏற்ப கூலி கொடுக்கப்படும்" என்று நபி (ஸல்) அவர்கள் கூறினார்கள். (அறிவிப்பவர்: ஆயிஷா (ரலி), நூல்: புகாரரி(1787).

பிராணியின் வயது:
குர்பானி கொடுக்கப்பட வேண்டிய பிராணிகளில் ஒட்டகம் ஐந்து வயது பூர்த்தியடைந்திருக்க வேண்டும். ஆடு, மாடு, இரண்டு வயது பூர்த்தியடைந்திருக்க வேண்டும்.

'முஸின்னா" வைத் தவிர வேறு எதையும் அறுக்காதீர்கள்! அது கிடைக்கவில்லையானால், ஆறுமாதக் குட்டியைக் கொடுங்கள் என்று நபி(ஸல்) அவர்கள் கூறினார்கள். (அறிவிப்பவர்: ஜாபிர் (ரலி), நூல்கள்: முஸ்லிம். அபூதாவூத், நஸயீ, இப்னுமாஜா (3141), அஹ்மத்.

இங்கு 'முஸின்னா" என்று கூறப்படும் வார்த்தை ஆடு, மாட்டில் இரண்டு பல் முளைத்த பிராணிகளுக்குப் பயன்படுத்தப்படும். ஒட்டகத்திற்கு ஐந்து வயது முடிந்தவுடனும் ஆடு, மாடு ஆகிய இரண்டு வகை கால்நடைகளுக்கும் இரண்டு வயது முடிந்தவுடன் இரண்டு பற்கள் வருவதால், ஒட்கத்திற்கு ஐந்து வயதும், ஆடு மற்றும் மாடு ஆகிய கால்நடைகளுக்கு இரண்டு வயதும் பூர்த்தியடைந்திருக்க வேண்டும் எனக் கூறப்படுகிறது.

இன்றைய நாளில் நாம் முதலாவதாக செய்வது தொழுகையாகும். பிறகு நாம் (வீட்டிற்கு) திரும்பிச் சென்று குர்பானி கொடுப்போம். யார் இப்படி நடந்து கொள்வாரோ அவர் நமது வழியில் நடந்து கொண்டார். யார் (தொழுமுன்) அறுத்தாரோ அவர் தன் குடும்பத்திற்காக மாமிசத்தை முற்படுத்திக் கொண்டார். அவருக்கு குர்பானியின் நன்மை எதுவும் கிடையாது என்று நபி(ஸல்) அவர்கள் கூறினார்கள். அப்போது அபூதர்தா இப்னு நியார்(ரலி) அவர்கள் (தொழுமுன்) அறுத்துவிட்டார். அவர் (நபி(ஸல்) அவர்களிடம்) என்னிடத்தில் 'முஸின்னாவை" விட சிறந்த ஆறுமாத குட்டி ஆடு உள்ளது. (அதை குர்பானி கொடுக்கலாமா?) என்றார். முன் அறுத்ததற்கு இதை பகரமாக்குவீராக! (அறுப்பீராக!) எனினும் உமக்குப் பிறகு வேறு எவருக்கும் இது (குர்பானி கொடுக்க) அனுமதியில்லை என்று நபி(ஸல்) அவர்கள் கூறினார்கள். (அறிவிப்பவர்: பரா(ரலி) நூல்கள்: புகாரி, (5560), முஸ்லிம்)

இந்த ஹதீஸில் நபித்தோழர் முஸின்னாவை விட சிறந்த ஆறுமாத குட்டி உள்ளது என்ற கூற்று நபி(ஸல்) அவர்கள் முஸின்னாவைத்தான் குர்பானி கொடுக்க கட்டளையிட்டுள்ளார்கள் என்பதைத் தெளிவாக எடுத்துக் காட்டுகிறது. உமக்குத் தவிர வேறு எவருக்கும் இது அனுமதியில்லை என்ற நபி(ஸல்) அவர்களின் கூற்றும் முஸின்னாவைத்தான் கொடுக்க வேண்டும் என்பதைத் தெளிவாக விளக்குகிறது. எனவே மேற்படி ஹதீஸின் அடிப்படையில் குர்பானி பிராணிகளின் வயது, ஒட்டமாக இருந்தால் ஐந்து வயது பூர்த்தியடைந்ததும், ஆடு மற்றும் மாடாக இருந்தால் இரண்டு வயது பூர்த்தியானதாக இருக்க வேண்டும் என்பதை அறிந்து கொள்ளலாம்.

கூட்டுக் குர்பானி:
ஒட்டகம், மாடு, இவற்றில் ஏழு நபர்கள் சேர்ந்து குர்பானி கொடுக்கலாம். அதாவது ஏழு நபர்கள் சேர்ந்து ஒரு ஒட்டகம் அல்லது மாடு வாங்கி ஏழு நபர்கள் சார்பாக குர்பானி கொடுக்கலாம்.

ஹுதைபியா ஆண்டில் நாங்கள் ஏழு நபர்கள் சார்பாக ஒரு ஒட்டகத்தையும், ஏழு நபர்கள் சார்பாக ஒரு மாட்டையும் குர்பானி கொடுத்தோம். (அறிவிப்பவர்: ஜாபிர் (ரலி), ஆதார நூல்கள்: முஸ்லிம், அபூதாவூத், திர்மிதி (1538) இப்னுமாஜா (3132).

ஒட்டகம் மற்றும் மாட்டில் மட்டும்தான் பலர் ஒன்று சேர்ந்து கூட்டுக் குர்பானி கொடுக்கலாம். ஆட்டில் ஒரு குடும்பம் மட்டும்தான் குர்பானி கொடுக்க முடியும்.

எங்கே கொடுப்பது:
குர்பானி பிராணியை ஈத்கா திடலில் அல்லது வீட்டில் அறுக்கலாம். இரண்டிற்கும் ஹதீஸ்களில் ஆதாரமுள்ளது.முஸல்லா என்னும் ;திடலில் நபி(ஸல்) அவர்கள் அறுப்பவர்களாக இருந்தனர். (அறிவிப்பவர்: இப்னு உமர் (ரலி), நூல்கள்: புகாரி (5552) அபூதாவூத்).

இன்றைய நாளில் நாம் முதலாவதாக செய்வது தொழுகையாகும். பிறகு நாம்(இல்லத்திற்குத்) திரும்பிச் சென்று குர்பானி கொடுப்போம். (அறிவிப்பவர்: பரா(ரலி), நூல்கள்: புகாரி (5545) முஸ்லிம்).

மேற்படி ஹதீஸில் 'நாம் திரும்பிச் சென்று" குர்பானி கொடுப்போம்" என்ற வாசகம் கவனிக்கத் தக்கது. நபி(ஸல்) அவர்கள் பெருநாள் தொழுகையை 'முஸல்லா" என்ற திடலிலேயே தொழுது வந்துள்ளனர். திடலிலேயே கொடுக்க வேண்டுமென இருந்தால் 'திரும்பிச் சென்று" என்ற வாசகத்தை நபி(ஸல்) அவர்கள் பயன்படுத்தியிருக்க மாட்டார்கள். இங்கே கொடுப்போம் என்றே சொல்லியிருப்பார்கள். எனவே திரும்பிச் சென்று என்ற வாசகம் 'முஸல்லா" என்ற திடலல்லாத வேறு இடத்தைக் குறிப்பிடுகிறது என்பதை விளங்கிக் கொள்ளலாம்.

கருப்பு நிறத்தால் நடக்கக்கூடிய, கறுப்பு நிறத்தால் அமரக்கூடிய, கறுப்பு நிறத்தால் பார்க்கக் கூடிய (அதாவது கால், மூட்டுக்கால், கண் பகுதி ஆகியவை கறுப்பு நிறமுடைய) ஆட்டை குர்பானி கொடுக்க வாங்கி வருமாறு கட்டளையிட்டார்கள். (ஆடு வந்ததும்) ஆயிஷாவே கத்தியை எடுத்து வா! என்றார்கள். பிறகு அதைக் கல்லில் தீட்டு! என்றார்கள். நான் அப்படியேச் செய்தேன். பிறகு கத்தியை வாங்கிக் கொண்டார்கள். ஆட்டைக் கீழேப் படுக்க வைத்து அறுத்தார்கள். (அறிவிப்பவர்: ஆயிஷா (ரலி), நூல்கள்: முஸ்லிம், அபூதாவூத், அஹ்மத்).

ஆயிஷா (ரலி) அவர்களிடம் கத்தியை எடுத்து வா என்று சொன்னதும், இது வீட்டில்தான் நடந்துள்ளது என்பதைத் தெளிவாகக் காட்டுகிறது. திடலில் நடந்திருந்தால் நபி(ஸல்) அவர்கள் தீட்டியக் கத்தியுடனேயே அங்கே சென்றிருப்பார்கள். 'கத்தியை எடுத்து வா" என்ற பேச்சிற்கே இங்கே இடமிருந்திருக்காது.

(வளரும் - அடுத்த பகுதி)

Saturday, January 08, 2005

இஸ்லாத்தின் வரலாறும், மாற்றாரின் உளறலும், 4

நபி(ஸல்) அவர்கள் ஸைனப்(ரலி) அவர்களை மணமுடித்த போது மக்களை அழைத்து விருந்து வைத்தார்கள். விருந்துக்கு வந்த மக்களில் சிலர் விருந்து முடிந்தும் திரும்பிச் செல்வதில் தாமதம் செய்தார்கள். இது நபி(ஸல்)அவர்களுக்கு சங்கடமாக இருந்தது, இதை அவர்களிடம் சொல்ல வெட்கப்பட்டார்கள். இது பற்றியே 33:53ம் வசனம் அருளப்பட்டது.

33:53. முஃமின்களே! (உங்களுடைய நபி) உங்களை உணவு அருந்த அழைத்தாலன்றியும், அது சமையலாவதை எதிர்பார்த்தும் (முன்னதாகவே) நபியுடைய வீடுகளில் பிரவேசிக்காதீர்கள்; ஆனால், நீங்கள் அழைக்கப் பட்டீர்களானால் (அங்கே) பிரவேசியுங்கள்; அன்றியும் நீங்கள் உணவருந்தி விட்டால் (உடன்) கலைந்து போய் விடுங்கள்; பேச்சுகளில் மனங்கொண்டவர்களாக (அங்கேயே) அமர்ந்து விடாதீர்கள்; நிச்சயமாக இது நபியை நோவினை செய்வதாகும்; இதனை உங்களிடம் கூற அவர் வெட்கப்படுவார்; ஆனால் உண்மையைக் கூற அல்லாஹ் வெட்கப்படுவதில்லை; நபியுடைய மனைவிகளிடம் ஏதாவது ஒரு பொருளை (அவசியப்பட்டுக்) கேட்டால், திரைக்கு அப்பாலிருந்தே அவர்களைக் கேளுங்கள். அதுவே உங்கள் இருதயங்களையும் அவர்கள் இருதயங்களையும் தூய்மையாக்கி வைக்கும்; அல்லாஹ்வின் தூதரை நோவினை செய்வது உங்களுக்கு தகுமானதல்ல அன்றியும் அவருடைய மனைவிகளை அவருக்குப் பின்னர் நீங்கள் மணப்பது ஒருபோதும் கூடாது; நிச்சயமாக இது அல்லாஹ்விடத்தில் மிகப்பெரும் (பாவ) காரியமாகும்.

இந்த வசனத்தில் ''நபியுடைய வீடுகளில் பிரவேசிக்காதீர்கள்'' என இறைவன் கூறுவது, நபி(ஸல்) அவர்களுடன் நேரடியாக வாழ்ந்த மக்களையே கட்டுப்படுத்தும். இதில் மற்ற முஸ்லிம்களுக்கு விருந்து உபச்சாரத்திற்கான சமுதாய சீர் திருத்தம் வலியுறுத்தப்படுகிறது - விருந்துக்குச் செல்பவர்கள் எப்படி நடந்து கொள்ள வேண்டும் என அறிவுரை முன் வைக்கப்படுகிறது. (முஸ்லிம்கள் பிறருடைய வீட்டில் அனுமதியின்றி நுழைய அனுமதிக்கப்படவில்லை என்பதை பார்க்க, 24:27,28,29 இறை வசனங்கள்.)

பர்தா சட்டம் இந்த நேரத்திலேயே அருளப்பட்டது என்பதை கீழ்கண்ட ஹதீஸ்களிலிருந்தும் விளங்கிக் கொள்ளலாம்.

''பர்தா (சட்டம்) தொடர்பான இந்த இறைவசனத்தை மக்களிலேயே அதிகமாக அறிந்தவன் நான்தான். (நபி(ஸல்) அவர்களின் துணைவியாரான) ஜஹ்ஷ் மகள் ஸைனப்(ரலி) இறைத்தூதர்(ஸல்) அவர்களிடம் மணப்பெண்ணாக அனுப்பி வைக்கப்பட்டு அவர்களுடன் வீட்டில் இருந்தார்கள். அப்போது நபி(ஸல்) அவர்கள் ('வலீமா'விருந்துக்கான) உணவைத் தயாரித்து மக்களை அழைத்தார்கள். மக்கள் (சாப்பிட்டுவிட்டு) பேசிக்கொண்டே அமர்ந்தார்கள். நபி(ஸல்) அவர்கள் வெளியே வரவும் திரும்பச் செல்லவுமாக இருந்தார்கள். மக்களோ பேசிக் கொண்டே அமர்ந்திருந்தனர். அப்போதுதான் அல்லாஹ்'' இறைநம்பிக்கையாளர்களே! நபியின் இல்லங்களில் (அழைப்பின்றி) நுழையாதீர்கள். அவ்வாறு (நபியின் இல்லத்தில் நடக்கும்) விருந்துக்காக உங்களுக்கு அனுமதியளிக்கப்பட்டாலும், அப்போதும் கூட உணவு தயாராவதை எதிர்பார்த்து (அங்கே காத்து) இராதீர்கள். மாறாக, (உணவு தயார்; வாருங்கள் என) நீங்கள் அழைக்கப்படும்போது நுழையுங்கள். சாப்பிட்டு முடிந்ததும் கலைந்து சென்றுவிடுங்கள். பேசிக்கொண்டிருப்பதில் ஆர்வமாய் இருந்துவிடாதீர்கள். நிச்சயமாக உங்களின் இச்செயல் நபிக்கு வேதனை அளிக்கிறது. ஆயினும், இதனை உங்களிடம் கூற அவர் வெட்கப்படுகிறார். ஆனால், அல்லாஹ்வோ சத்தியத்தைக் கூற வெட்கப்படுவதில்லை. நபியின் துணைவியரிடம் நீங்கள் ஏதேனும் ஒரு பொருளை (அவசியப்பட்டு) கேட்கவேண்டுமென்றால், திரைக்குப் பின்னாலிருந்து கேளுங்கள்'' எனும் (திருக்குர்ஆன் 33:53 வது) வசனத்தை அருளினான். இதையடுத்துத் திரை போடப்பட்டது. மக்களும் எழுந்துவிட்டார்கள்''. (அனஸ் இப்னு மாலிக் (ரலி) புகாரி)

''நான், 'இறைத்தூதர் அவர்களே! தங்களிடம் நல்லவரும் கெட்டவரும் வருகின்றனர். எனவே, தாங்கள் (தங்களின் துணைவியரான) இறை நம்பிக்கையாளர்களின் அன்னையரை பர்தா அணியும்படி கட்டளையிட்டால் நன்றாயிருக்குமே!'' என்று சொன்னேன். அப்போது அல்லாஹ் பர்தா (சட்டம்) தொடர்பான வசனத்தை அருளினான்''. (உமர்(ரலி) புகாரி)

33:59வது இறைவசனம், நபி(ஸல்) அவர்களின் மனைவிமார்களுக்கு மட்டும் தலை முந்தானைகளைத் தாழ்த்திக் கொள்ளுமாறு கட்டளையிடவில்லை. ஒட்டு மொத்த முஸ்லிம் சமுதாயப் பெண்களையும் சேர்த்தே குறிப்பிடுகிறது. 33:59வது வசனம் நபி(ஸல்) அவர்களின் மனைவிமார்களுக்கு மட்டுமே பொருந்தும். என்று வாதிப்பவர்கள் ''ஈமான் கொண்வர்களின் பெண்களுக்கும்'' என்று இறைவன் குறிப்பிடுவது நம்பிக்கை கொண்ட பெண்களுக்கும் - அனைத்து முஸ்லிம் பெண்களையும் குறித்துப் பேசுகிறது என்பதை விளங்கிக் கொள்ளட்டும்.

//இந்த வசனம் 'வஹி' எனப்படும் 'இறை ஆவேசம்' மூலம் முகமது நபியவர்களுக்கு வந்து இறங்கிய காலத்தைப் பார்த்தோமானால், அப்போது அவர் மிகுந்த சங்கடத்தில் ஆழ்ந்திருந்த காலம் என்பதை பார்க்கலாம். அவர் தமது (வளர்ப்பு) மகனாகிய சைத்-தினுடைய மனைவியான ஜைனப் பை மணந்து கொண்டது குறித்து, அவருக்கு கடும் எதிர்ப்பு கிளம்பியிருந்தது. நபிகளுக்கு அடைக்கலம் கொடுத்த மதீனா வாசிகளும், அவரது மனைவிகளும் கூட இது சம்பந்தமாய் அதிர்ச்சியடைந்து அவருக்கு எதிர்ப்பாயிருந்தனர்.//

'வஹீ' யை 'இறை ஆவேசம்' என்று மொழி பெயர்த்து ஆவேசப்பட்டிருக்கிறார். இறை ஆவேசம் என்று நாமறிந்து இதுவரை எவரும் மொழி பெயர்த்ததில்லை, எந்த அகராதி நூலிலும் 'வஹீ' யை இறை ஆவேசமாகப் பொருள் கொள்ளவில்லை.

''அவர் தம் இச்சைப்படி (எதையும்) பேசுவதில்லை. அது அவருக்கு 'வஹீ' மூலம் அறிவிக்கப்பட்டதேயன்றி வேறில்லை. (அல்குர்ஆன் 53:3,4)

'வஹீ' யை இறை ஆவேசம் என மொழி பெயர்ப்பில் மேல் காணும் இறைவசனத்தை வாசித்தால், 'அது அவருக்கு 'இறை ஆவேசம்' மூலம் அறிவிக்கப்பட்டதேயன்றி வேறில்லை' இப்படித்தான் வாசிக்க முடியும். எனவே 'வஹீ' யை 'இறை ஆவேசம்' என்று எழுதியது அறியாமையின் காரணம் எனப் புறக்கணிப்போம்.

//ஜைனப் பை மணந்து கொண்டது குறித்து, அவருக்கு கடும் எதிர்ப்பு கிளம்பியிருந்தது. நபிகளுக்கு அடைக்கலம் கொடுத்த மதீனா வாசிகளும், அவரது மனைவிகளும் கூட இது சம்பந்தமாய் அதிர்ச்சியடைந்து அவருக்கு எதிர்ப்பாயிருந்தனர்.//

நபி(ஸல்) அவர்களுக்கு அடைக்கலம் தந்த மதீனாவாசிகளான அன்சாரிகள், நபி(ஸல்) அவர்கள் ஸைனபை(ரலி) அவர்களை மணந்த போது நபி(ஸல்) அவர்களுக்கு எதிர்ப்பாயிருந்தனர் என்பது அப்பட்டமான பொய் என்று நாம் கூறுகிறோம். உண்மை என்றால் சம்பந்தப்பட்டவர்கள் ஆவணங்களை வைத்து நிரூபிக்கட்டும்.

//அவரது மனைவிகளும் கூட இது சம்பந்தமாய் அதிர்ச்சியடைந்து அவருக்கு எதிர்ப்பாயிருந்தனர்.//

21ம் நூற்றாண்டில் இருந்து கொண்டு இதே கண்ணோட்டத்துடன், 6ம் நூற்றாண்டின் உலக நாடுகளின் சரித்திர வரலாற்றை ஒப்பிட்டு நோக்குவது வராலாற்றின் அறியாமையை வெளிப்படுத்துகிறது. ஆண்கள் பலதார மணமுடித்துக் கொள்வது அக்காலத்தில் சர்வ சாதாரணம். அக்காலப் பெண்களும் இதை எதிர்க்கவில்லை. ஆண்களின் பலதார மணத்தை, திருமணக் கலாச்சாரமாகவே அன்றைய சமூகமும் அங்கீகரித்திருந்தது. பெண்களும் பலதாரத் திருமணக் கலாச்சாரத்தை ஏற்றுக் கொண்டிருந்தனர். நபி(ஸல்) அவர்களின் மனைவிமார்களிடையே சக்களத்தி சண்டைகள் நடந்திருக்கின்றன, ஒருவர் மற்றவர் மீது பொறாமை கொண்டிருக்கிறார்கள். (பார்க்க, 66:1-5) இது அவர்களின் பெண்ணியல்பாக இருந்தது.

நபி(ஸல்) அவர்களின் பலதார மணத்தை, நபி(ஸல்) அவர்களின் மனைவிகள் எதிர்த்தார்கள் என எந்த ஆதாரமும் இல்லை. நபி(ஸல்) அவர்கள் தமது மாமி மகளாகிய ஸைனப்(ரலி) அவர்களை மணமுடித்த போது நபி(ஸல்) அவர்களின் மனைவிமார்கள், ஸவ்தா, ஆயிஷா, ஹஃப்ஸா, குஸைமாவின் மகள் ஸைனப் ஆகிய நான்கு பெண்களும் அத்திருமணத்தைக் கண்டு அதிர்ச்சியடையவில்லை, எதிர்க்கவில்லை. மாறாக ''பாரக்கல்லாஹ்'' - அல்லாஹ் தங்களுக்கு சுபிட்சம் வழங்கட்டும். என்று நான்கு மனைவிமார்களும் நபி(ஸல்) அவர்களுக்கு மணவாழ்த்துக் கூறினார்கள். (புகாரி)

வரலாறு இவ்வளவு தெளிவாக இருக்க, நபி(ஸல்) அவர்கள் மனைவிமார்கள் 'அதிர்ச்சியடைந்தார்கள், எதிர்ப்பாயிருந்தார்கள் என்று சொல்வதெல்லாம் மிகைப்படுத்தப்பட்ட கற்பனை.

//முகமது நபியவர்களுக்கு வந்து இறங்கிய காலத்தைப் பார்த்தோமானால், அப்போது அவர் மிகுந்த சங்கடத்தில் ஆழ்ந்திருந்த காலம் என்பதை பார்க்கலாம்.//

மிகுந்த சங்கடத்தில் ஆழ்ந்திருந்த காலம், என்பது உண்மையே. நபி(ஸல்) அவர்கள் ஸைனப்(ரலி) அவர்களை மணமுடித்ததால் ஏற்பட்ட சங்கடங்கள் அல்ல. பஞ்சாத்தால் ஏற்பட்ட வறுமை சங்கடமான காலமாக இருந்தது. நபி(ஸல்) அவர்களும், நபியைப் பின் பற்றிய அன்றைய முஸலிம்களும் இச்சங்கடங்களை சோதனையாகவேக் கருதி பொறுமையை கடைப்பிடித்தனர். இது உஹதுப் போர் நடந்து முடிந்த காலம் - அகழ்ப் போர் நிகழ்வுக்கு முன் அகழ் தோண்டிக் கொண்டிருக்கும் நேரம் நபி(ஸல்) அவர்களும், நபித்தோழர்களும் பஞ்சத்தால் வறுமைக்குத் தள்ளப்பட்டனர்.
தொடர்ந்து மூன்று நாள்கள் கூட உணவின்றி கொலைப் பட்டினியில் வயிற்றில் கல்லைக் கட்டிக்கொண்டு அந்த நிலையில் அகழ் தோண்டுகிறார்கள். நபி(ஸல்) அவர்களும் பட்டினியின் காரணமாக வயிற்றில் கல்லைக் கட்டிக்கொண்டு அகழ் வெட்டும் பணியில் மண் சுமக்கிறார்கள். இதுதான் சரித்திர உண்மை.

பஞ்சத்தால் ஏற்பட்ட வறுமை நேரத்தில், நபி(ஸல்) அவர்களின் மனைவியரில் சிலர் பொறுமை இழக்கிறார்கள். அப்போது அருளப்பட்ட இறை வசனங்கள் இதுதான்,

33:28. நபியே! உம்முடைய மனைவிகளிடம், ''நீங்கள் இவ்வுலக வாழ்க்கையையும், இதன் அலங்காரத்தையும் நாடுவீர்களானால், வாருங்கள்! நான் உங்களுக்கு வாழ்க்கைக்கு உரியதைக் கொடுத்து அழகிய முறையில் உங்களை விடுதலை செய்கிறேன்.

33:29. ''ஆனால், நீங்கள் அல்லாஹ்வையும், அவன் தூதரையும், மறுமையின் வீட்டையும் விரும்புவீர்களானால், அப்பொழுது உங்களில் நன்மையாளர்களுக்காக அல்லாஹ் மகத்தான நற்கூலி நிச்சயமாக சித்தம் செய்திருக்கிறான்" என்றும் கூறுவீராக!

நீங்கள் அல்லாஹ்வையும், அல்லாஹ்வின் தூதரையும், மறுமையையும் விரும்புபவர்களாக இருந்தால் சோதனைகளைப் பொறுத்துக் கொள்ள வேண்டும். இவ்வுலக வாழ்க்கையை விரும்புபவர்களாக இருந்தால் ''வாருங்கள் உங்களை அழகிய முறையில் விடுதலை செய்து விடுகிறேன்'' என்று நபி(ஸல்) அவர்களின் மனைவிமார்களுக்கு கோரிக்கை வைக்கப்படுகிறது.

நபி(ஸல்) அவர்களுக்கு பிறகு, நபி(ஸல்) அவர்களின் மனைவிகள் வேறு எவரையும் மணந்து கொள்ளக் கூடாது என்றும். நபி(ஸல்)அவர்களின் மனைவிமார்கள் முஸ்லிம்கள் அனைவருக்கும் அன்னையைப் போன்றவர்கள், அதாவது அவர்களைத் திருமணம் செய்வது முஸ்லிம்களுக்கு விலக்கப்பட்டுள்ளது. என்றும் அருளப்பட்ட (33:53) வசனத்தின் கடைசிப் பகுதி நபி(ஸல்) அவர்களின் மனைவிமார்கள் மீது கட்டாயப்படுத்தப்பட்ட நிபந்தனையா? என்றால் நிச்சயமாக இல்லை.

நபி(ஸல்) அவர்களுக்குப்பின் மறுமணம் செய்து கொள்ள விரும்பாதவர்கள் மட்டுமே நபி(ஸல்) அவர்களின் மனைவியாக தொடர்ந்து இருக்கலாம். நபி(ஸல்) அவர்களுக்குப்பின் மறுமணம் செய்து கொள்ள விரும்புபவர்கள் இப்போதே மணவிலக்குப் பெற்று நபி(ஸல்) அவர்களிடமிருந்து பிரிந்து விடலாம். என எதைத் தேர்ந்தெடுப்பது என்ற உரிமை, நபி(ஸல்) அவர்களின் மனைவிமார்களின் விருப்பத்திற்கே விடப்பட்டது.

''இறைத்தூதர்(ஸல்) அவர்களின் துணைவியருக்கு (அவர்கள் விரும்பினால் தம்முடன் சேர்ந்து வாழலாம்; அல்லது பிரிந்துவிடலாம் என) உரிமையளித்திடுமாறு அல்லாஹ்வின் தூதருக்குக் கட்டளையிடப்பட்டபோது, அவர்கள் என்னிடம்தான் முதன்முதலாக விஷயத்தைக் கூறினார்கள்: '(ஆயிஷா!) நான் உனக்கு ஒரு விஷயத்தைச் சொல்கிறேன். (என்று அதைச் சொல்லிவிட்டு,) 'நீ உன் பெற்றோரிடம் அனுமதி கேட்டுக்கொள்ளும் வரை அவசரப்படவேண்டாம்'' என்று கூறினார்கள்.

என் பெற்றோர் நபி(ஸல்) அவர்களைப் பிரிந்துவிடும்படி உத்தரவிடப் போவதில்லை என்று அவர்களுக்குத் தெரிந்திருந்தது. பிறகு அவர்கள்,
'நபியே! உங்கள் துணைவியரிடம் கூறுங்கள்: நீங்கள் இவ்வுலக வாழ்க்கையையும், அதன் அலங்காரத்தையும் (மட்டுமே) விரும்புவீர்களாயின், வாருங்கள்! உங்களின் வாழ்க்கைக்கு உரியதைக் கொடுத்து நல்லமுறையில் உங்களை விடுவித்து விடுகிறேன். ஆனால், நீங்கள் அல்லாஹ்வையும் அவனுடைய தூதரையும் மறு உலகையும் விரும்புவீர்களானால், நிச்சயமாக அல்லாஹ் உங்களிலுள்ள (இத்தகைய) நல்லவர்களுக்காக மகத்தான நற்பலனை தயார் செய்து வைத்துள்ளான்'' எனும் (திருக்குர்ஆன் 33:28, 29)வசனங்களை ஓதினார்கள். அப்போது நான், 'இது தொடர்பாக என் பெற்றோரிடம் நான் என்ன அனுமதி கேட்பது? நான் அல்லாஹ்வையும் அவனுடைய தூதரையும் மறுமை வீட்டையுமே விரும்புகிறேன்'' என்று சொன்னேன். பிறகு நபி(ஸல்) அவர்களின் இதரத் துணைவியரும் என்னைப் போன்றே செயல்பட்டனர்''. (ஆயிஷா (ரலி) புகாரி)

நபி(ஸல்)அவர்களின் மனைவிமார்கள், நபி(ஸல்) அவர்களுக்குப்பின் எவரையும் மணக்கக்கூடாது என்பதை நபி(ஸல்) அவர்களின் மனைவிமார்களே விரும்பி ஏற்றுக் கொண்டார்கள். அல்லாஹ்வும், அல்லாஹ்வின் தூதரும் இதில் நிர்ப்பந்திக்கவில்லை என்பது தெளிவு. நபி(ஸல்) அவர்களின் மனைவிமார்கள் உலக முஸ்லிம்கள் அனைவருக்கும் அன்னையைப் போன்றவர்கள் - மணமுடிக்க விலக்கப்பட்டவர்கள். இது எல்லாப் பெண்களுக்கும் கிடைக்கும் அந்தஸ்து அல்ல. இதனாலேயே ''நபியின் மனைவிகளே நீங்கள் பெண்களில் மற்றப் பெண்களைப் போலல்ல'' (33:32) என்று இறைவன் மற்றப் பெண்களிலிருந்து நபி(ஸல்) அவர்களின் மனைவிமார்களை வித்தியாசப்படுத்துகின்றான். அதுமட்டுமல்ல அவர்களுக்கென்று சில அறிவுரைகளையும், எச்சரிக்கைகளையும் போதிக்கிறான் என்பதை கீழ்வரும் இறை வசனங்களிலிருந்து அறியலாம்.

33:30நபியுடைய மனைவிகளே! உங்களில் எவரேனும் பகிரங்கமான மானக்கேடு செய்வாராயின், அவருக்கு வேதனை இரட்டிக்கப்படும்; இது அல்லாஹ்வுக்கு மிகவும் சலபமேயாகும்!

33:31. அன்றியும் உங்களில் எவர் அல்லாஹ்வுக்கும் அவனுடைய தூதருக்கும் வழிபட்டு, நல்ல அமல் செய்கிறாரோ, அவருக்கு நாம் நற்கூலியை இருமுறை வழங்குவோம்; இன்னும் அவருக்கு கண்ணியமான உணவையும் சித்தம் செய்திருக்கிறோம்.

33:32. நபியின் மனைவிகளே! நீங்கள் பெண்களில் மற்றப் பெண்களைப் போலல்ல நீங்கள் இறையச்சத்தோடு இருக்க விரும்பினால், (அந்நியருடன் நடத்தும்) பேச்சில் நளினம் காட்டாதீர்கள். ஏனெனில் எவன் உள்ளத்தில் நோய் (தவறான நோக்கம்) இருக்கின்றதோ, அ(த்தகைய)வன் ஆசை கொள்வான், இன்னும் நீங்கள் நல்ல பேச்சே பேசுங்கள்.

33:33. (நபியின் மனைவிகளே!) நீங்கள் உங்கள் வீடுகளிலேயே தங்கியிருங்கள், முன்னர் அஞ்ஞான காலத்தில் (பெண்கள்) திரிந்து கொண்டிருந்ததைப் போல் நீங்கள் திரியாதீர்கள், தொழுகையை முறைப்படி உறுதியுடன் கடைப்பிடித்து தொழுங்கள்; ஜகாத்தும் கொடுத்து வாருங்கள். அல்லாஹ்வுக்கும், அவனுடைய தூதருக்கும் கீழ்படியுங்கள்; (நபியின்) வீட்டையுடையவர்களே! உங்களை விட்டும் அசத்தங்களை நீக்கி, உங்களை முற்றிலும் பரிசத்தமாக்கிவிடவே அல்லாஹ் நாடுகிறான்.

33:34மேலும் உங்களுடைய வீடுகளில் ஓதப்படுகின்றனவே அல்லாஹ்வின் வசனங்கள் (அவற்றையும்) ஞான விஷயங்களையும் (ஹிக்மத்) நினைவில் வைத்துக் கொள்ளுங்கள் - நிச்சயமாக அல்லாஹ் (உங்கள் உள்ளங்களிலுள்ளவை பற்றி) சூட்சமமாகத் தெரிந்தவன்; (உங்கள் செயல்கள் பற்றி) நன்கறிந்தவன்.

நபியின் மனைவிகளை ''உங்கள் வீட்டிலேயே தங்கியிருங்கள்'' என்று இறைவன் கூறுவதால் அவர்கள் வீட்டை விட்டு வெளியே வராமல் வீட்டிற்குள்ளேயே அடைந்து கிடக்க வேண்டுமா? என்றால், இல்லை.

''பர்தா அணிவது சட்டமாக்கப்பட்ட பின்னால், தம் தேவைக்காக வேண்டி (நபி(ஸல்) அவர்களின் துணைவியரான) ஸவ்தா பின்த் ஸம்ஆ(ரலி) வெளியே சென்றார்கள். அவர்கள், (உயரமான) கனத்த சாரீரமுடைய பெண்மணியாக இருந்தார்கள். அவர்களை அறிந்தவர்களுக்கு அவர்கள் யார் என்று (அடையாளம்) தெரியாமலிருக்காது. அவர்களை அப்போது, உமர் இப்னு கத்தாப்(ரலி) பார்த்துவிட்டு 'ஸவ்தாவே, அல்லாஹ்வின் மீதாணையாக, நீங்கள் யார் என்று எங்களுக்குத் தெரியாமலில்லை. நீங்கள் (யார் என்று அடையாளம் தெரிகிற வகையில்) எப்படி வெளியே வந்திருக்கிறீர்கள் பாருங்கள்!'' என்று கூறினார்கள். ஸவ்தா(ரலி) உடனே அங்கிருந்து திரும்பிவிட்டார்கள். இறைத்தூதர்(ஸல்) அவர்கள் என் வீட்டில் இரவு உணவு அருந்திக் கொண்டிருந்தார்கள். அவர்களின் கரத்தில் எலும்புத் துண்டு ஒன்று இருந்தது. அப்போது ஸவ்தா(ரலி) வீட்டினுள் வந்து, 'இறைத்தூதர் அவர்களே! நான் என் தேவை ஒன்றிற்காக வெளியே சென்றேன். உமர்(ரலி) என்னிடம் இவ்வாறெல்லாம் கூறினார்கள்'' என்று கூறினார்கள். அப்போது அல்லாஹ், நபி(ஸல்) அவர்களுக்கு 'வஹீ' (வேத வெளிப்பாடு) அறிவித்தான். பிறகு அந்நிலை அவர்களைவிட்டு நீக்கப்பட்டது. எலும்புத் துண்டு அவர்களின் கரத்தில் அப்படியே இருந்தது; அதை அவர்கள் (கீழே) வைத்துவிடவில்லை. அப்போது நபி(ஸல்) அவர்கள் 'நீங்கள் உங்கள் தேவைக்காக வெளியே செல்லலாம் என்று உங்களுக்கு அனுமதிக்கப்பட்டுள்ளது'' என்று கூறினார்கள். (ஆயிஷா(ரலி) புகாரி)

நபியின் மனைவிகள் அஞ்ஞானக் காலத்துப் பெண்கள் போல் அலையக்கூடாது என்பதையே இறைவன் தடுக்கிறான் தங்களின் தேவைக்காக நபியின் மனைவிகள் வெளியில் சென்று வருவதைத் தடை செய்யவில்லை என்பதை அறியலாம்.

(இன்னும் வரும்)

Wednesday, January 05, 2005

இஸ்லாத்தின் வரலாறும், மாற்றாரின் உளறலும், 3

இஸ்லாத்தைக் களங்கப்படுத்திட வேண்டும் என்ற வெறியோடு ஒரு உண்மையுடன் பல பொய்களைக் கலந்து அந்தப் பொய்களையும் இஸ்லாம் அங்கீகரித்திருக்கிறது என்ற பொய்யைத்தான், தமது (இஸ்லாத்தில் பர்தா - வரலாறும், நிகழ்வுகளும்.) கட்டுரை முழுக்க விதைத்திருக்கிறார்.

// மேலே கண்ட திருக்குரான் வசனங்கள் அருளப் பட்ட பின்னும், மற்ற முஸ்லீம் பெண்கள் சுதந்திரமாக முகமது நபியவர்களின் கூட மசூதியில் அமர்ந்து பிரார்த்தனை செய்தார்கள் என்றும், பர்தா அணியாமல் அவர் முன்வந்து பேசினார்கள் என்றும், சில பெண்களின் அழகில் மயங்கி அவர்களின் முகத்தையே (முகமது நபி அருகில் இருக்கும்போதே) மற்றவர்கள் பார்த்துக் கொண்டிருந்தார்கள் என்று குறிப்பிட்டும் பல ஹதீதுகள் காணப் படுகின்றன.//

நபி(ஸல்) அவர்களின் காலத்தில், தொழும் பள்ளிவாசலில் கூட்டுத் தொழுகையில் ஆண்களும், பெண்களும் தனித்தனி அணிவகுப்புடன் கலந்து கொண்டார்கள். பெருநாள்களின் தொழுகையிலும், பிரார்த்தனையிலும் ஆண்களும், பெண்களுக்கென உள்ள தனி இடத்தில் பெண்களும் பங்கெடுத்துக் கொண்டார்கள். இதை இஸ்லாம் அங்கீகரித்துள்ளது. ஆனால் இஸ்லாத்தின் எதிரிகள் எழுதியுள்ளது போல் ''நபி(ஸல்) அவர்கள் இருக்கும்போதே சில பெண்களின் அழகில் மயங்கி அவர்களின் முகத்தையே மற்றவர்கள் பார்த்துக் கொண்டிருந்தார்கள் என்று பல ஹதீஸ்கள் காணப்படுகின்றன'' என்பவர்கள். இதை நபி(ஸல்) அவர்கள் அனுமதித்ததாக ஒரு ஹதீஸை முன் வைக்கட்டும். கட்டுக்கதையின் உண்மை நிலை என்னவென்று பார்ப்போம்.

('விடைபெறும்' ஹஜ்ஜின்போது) அல்லாஹ்வின் தூதர்(ஸல்) அவர்கள் (என் சகோதரர்) ஃபள்ல் இப்னு அப்பாஸைத் தமக்குப் பின்னால் வாகனத்தில் அமர்த்திக் கொண்டார்கள். ஃபள்ல் மிகவும் அழகானவராயிருந்தார். அப்போது நபி(ஸல்) அவர்கள் மக்களுக்கு மார்க்க விளக்கம் அளிப்பதற்காகத் தம் வாகனத்தை நிறுத்தியிருந்தார்கள். (அப்போது) 'கஸ்அம்' குலத்தைச் சேர்ந்த அழகான பெண்ணொருத்தி இறைத்தூதர்(ஸல்) அவர்களிடம் மார்க்க விளக்கம் கேட்டு வந்தார். அப்போது ஃபள்ல் அப்பெண்ணைக் கூர்ந்து நோக்கலானார். அந்தப் பெண்ணின் அழகு அவருக்கு ஆச்சரியத்தை ஊட்டியது. நபி(ஸல்) அவர்கள் திரும்பிப் பார்த்தபோது ஃபள்ல் அப்பெண்ணைக் கூர்ந்து பார்ப்பதைக் கண்டார்கள். உடனே ஃபள்லின் முகவாயைத் தம் கரத்தால் பிடித்து அப்பெண்ணைப் பார்க்க விடாமல் அவரின் முகத்தைத் திருப்பிவிட்டார்கள்.

அப்போது அப்பெண், 'இறைத்தூதர் அவர்களே! அல்லாஹ் தன் அடியார்களின் மீது விதித்துள்ள ஹஜ், என் தந்தையின் மீது கடமையாயிற்று. அவரோ வயது முதிந்தவர்; வாகனத்தில் அவரால் சரியாக அமர இயலாது. எனவே, நான் அவர் சார்பாக ஹஜ் செய்தால் அது நிறைவேறுமா?' என்று கேட்டார். நபி(ஸல்) அவர்கள், 'ஆம் (நிறைவேறும்)'' என்று பதிலளித்தார்கள். (அப்துல்லாஹ் இப்னு அப்பாஸ் (ரலி) புகாரி)

ஒரு உண்மை சம்பவத்தை பல பொய்கள் கலந்து எப்படியெல்லாம் இஸ்லாத்தை களங்கப்படுத்துகிறார். ஃபள்ல் (ரலி) என்ற தனிநபர், மற்றொரு தனிநபராகிய அழகானப் பெண்ணைக் கூர்ந்து நோக்கியதால் அந்த சமூகத்தின் ஆண்கள், அந்த சமூகத்தின் பெண்களைக் கூர்ந்து நோக்கியதாகவும், அதுவும் நபி(ஸல்) அவர்களின் அனுமதியுடன் உற்று நோக்கியதாக கதை அமைக்கிறார்.

நபி(ஸல்) அவர்கள் ஃபள்ல் (ரலி) அவர்களின் முகத்தைப் பிடித்து அப்பெண்ணைப் பார்க்க விடாமல் திருப்பியதிலிருந்து அன்னியப் பெண்களைப் பார்ப்பதிலிருந்தும் முஸ்லிம் ஆண்கள் பார்வையை தாழ்த்திக் கொள்ள வேண்டும் என்ற சட்டமே நிலைநாட்டப்படுகிறது.

//ஆண்கள் பார்வையைத் தாழ்த்திக் கொள்ளச் சொல்லும் வசனத்தை எந்த இஸ்லாமியரும் கண்டு கொண்டதாகத் தெரியவில்லை// உலக முஸ்லிம்களை எல்லாம் ''பார்வையைத் தாழ்த்துகிறார்களா''? என்பதை முழுமையாக கண்காணித்து விட்டது போல் இப்படியும் ஒரு உளறலை வைத்திருக்கிறார். (வேறு வேலையே இல்லையா?)

இன்னும் பாருங்கள்!
//இதில் ஆடை விலகிய நிலையில் முகமது நபிகள் ஜைனப்பை பார்த்தார் என்ற குற்றச் சாட்டுக்கு பதிலளிக்கு முகமாகவே, இனிமேல் முகமது நபிகளின் மனைவிகளையும், அங்கிருந்த கூட்டத்தாரின் ஏனைய பெண்களையும் தமது 'தலை முந்தானைகளை தாழ்த்திக் கொள்ளுமாறு' இறைவன் கேட்டுக் கொண்டதைக்[10] கவனிக்க வேண்டும். இந்த வசனத்துக்கு முந்தய, பிந்தய வசனங்களைக் கவனித்தோமானால், இதன் பின்னனி விளங்கும். திருக்குரான் வசனம் 33:59 க்கு முந்தய வசங்கள்://

நபி(ஸல்) அவர்கள், ஸைனப் (ரலி) அவர்களை ஆடை விலகிய நிலையில் பார்த்தார்கள் என்ற அவதூறை மறுத்து நாம் முன்பு விளக்கியுள்ளோம். நபி(ஸல்) அவர்கள் ஸைனப் (ரலி) அவர்களை மணமுடித்த போது அத்திருமணம் அன்றைய இஸ்லாத்தின் எதிரிகளால் விமர்சிக்கப்பட்டது. இன்றைய எதிரிகள் அவதூறு சொல்வது போல் ஸைனப்(ரலி) யை ஆடை விலகிய நிலையில் நபி(ஸல்) அவர்கள் பார்த்தார்கள். என்பதல்ல. அன்றைய எதிரிகளின் விமர்சனத்தைப் பார்ப்போம்.

(இங்கே சென்ற பதிவில் அறியாமை காலத்துத் திருமண நாகரீகம் பற்றிய வரலாற்றைச் சுருக்கமாக எழுதியிருந்தோம். அதை மீண்டும் ஒருமுறை பார்வையிட்டு மேலே தொடர்வோம்)

அறியாமை காலத்தில் ஒருவர் பத்து மனைவிவரை மணந்து கொள்ளலாம் என்று இருந்தது. அந்த மக்களிடையே இஸ்லாம் அறிமுகப்படுத்தப்பட்ட பின் முஸ்லிம்கள் ஒரே நேரத்தில் நான்கு மனைவிக்கு மேல் திருமணம் செய்து கொள்வது தடை செய்யப்பட்டது.

நபி(ஸல்) அவர்கள் முதலில் கதீஜா(ரலி)யை மணமுடித்தார்கள். கதீஜா(ரலி)அவர்களின் மரணத்திற்குப்பின், ஸம்ஆ என்பவரின் மகள் ஸவ்தா(ரலி) அவர்களை மணமுடித்தார்கள். இதன் பிறகு அபூபக்ரின் மகள் ஆயிஷா(ரலி) அவர்களை மணமுடித்தார்கள். இதன் பின் உமரின் மகள் ஹஃப்ஸா(ரலி) அவர்களை மணமுடித்தார்கள். இதன் பிறகு குஸைமாவின் மகள் ஸைனப்(ரலி) அவர்களை மணமுடித்தார்கள். (இவர் வேறு ஸைனப் ஆவார்) நபி(ஸல்) அவர்கள் இதுவரை ஐந்து திருமணம் செய்திருந்தார்கள். அதில் கதீஜா(ரலி) மரணித்து விட்டதால் நான்கு மனைவிகளுடன் வாழ்ந்து வந்தார்கள்.

நபி(ஸல்) அவர்கள் ஜஹ்ஷ் என்பவரின் மகள் ஸைனப்(ரலி) அவர்களை ஆறாவது மனைவியாக மணமுடித்த போது ஒரே நேரத்தில் நான்கு மனைவிகள் என்ற வரம்பு மீறப்பட்டு, ஒரே நேரத்தில் ஐந்து மனைவிகள் என்ற நிலை வருவதால், அன்றைய இஸ்லாத்தின் எதிரிகள் (மதீனா வாழ் யூதர்கள்) ''முஹம்மது ஒரே நேரத்தில் நான்கு மனைவிக்கு மேல் வைத்திருப்பது தடை செய்யப்பட்டிருப்பதாகக் கூறிகின்றார். ஆனால் தாமே ஐந்தாவது மனைவியை எப்படி மணமுடித்துக் கொண்டார்? என்று ஆட்சேபணை செய்தார்கள். முஸ்லிம்களில் சிலர் (அறியாமைக்காலத் திருமணம் போல்) ஒரே நேரத்தில் நான்கு என்ற வரம்பு நீக்கப்படுமோ? என்றும் நினைத்தார்கள். இதற்கு விளக்கமாகவே 33:50 வசனத்தில் இறைவன் பதிலளிக்கிறான்.

33:50நபியே! எவர்களுக்கு நீர் அவர்களுடைய மஹரை கொடுத்து விட்டீரோ அந்த உம்முடைய மனைவியரையும், உமக்கு(ப் போரில் எளிதாக) அல்லாஹ் அளித்துள்ளவர்களில் உம் வலக்கரம் சொந்தமாக்கிக் கொண்டவர்களையும், நாம் உமக்கு ஹலாலாக்கி இருக்கின்றோம்; அன்றியும் உம் தந்தையரின் சகோதரர்களின் மகள்களையும், உம் தந்தையரின் சகோதரிகள் மகள்களையும், உம் மாமன் மார்களின் மகள்களையும், உம் தாயின் சகோதரிமாரின் மகள்களையும் - இவர்களில் யார் உம்முடன் ஹிஜ்ரத் செய்து வந்தார்களோ அவர்களை (நாம் உமக்கு விவாகத்திற்கு ஹலாலாக்கினோம்) அன்றியும் முஃமினான ஒரு பெண் நபிக்குத் தன்னை அர்ப்பணித்து, நபியும் அவளை மணந்து கொள்ள விரும்பினால் அவளையும் (மணக்க நாம் உம்மை அனுமதிக்கின்றோம்) இது மற்ற முஃமின்களுக்கன்றி உமக்கே (நாம் இத்தகு உரிமையளித்தோம்; மற்ற முஃமின்களைப் பொறுத்தவரை) அவர்களுக்கு அவர்களுடைய மனைவிமார்களையும், அவர்களுடைய வலக்கரங்கள் சொந்தமாக்கிக் கொண்டவர்களையும் பற்றி நாம் கடமையாக்கியுள்ளதை நன்கறிவோம்; உமக்கு ஏதும் நிர்ப்பந்தங்கள் ஏற்படாதிருக்கும் பொருட்டே (விதி விலக்களித்தோம்) மேலும் அல்லாஹ் மிக மன்னப்பவன்; மிக்க அன்புடையவன்.

ஒரே நேரத்தில் நான்குக்கும் அதிகமான மனைவியை வைத்திருப்பது இறைத்தூதர் (ஸல்) அவர்களுக்கு மட்டுமே உள்ள அனுமதி. மற்ற முஸ்லிம்கள் ஒரே நேரத்தில் நான்கு மனைவிக்கு மேல் மணமுடிக்க அனுமதி இல்லை என்பதை மேற்காணும் வசனத்திருந்து விளங்கிக் கொள்ளலாம்.

//யாரை வேண்டுமானாலும் முகமது நபி மணந்து கொள்ளலாம், (அவருக்கு அடங்கி நடக்காத) மனைவியரை விவாகரத்து செய்து விடலாம்[8],//

33:51வது வசனத்தை தவறாக விளங்கி இப்படி விமர்சித்திருக்கிறார். இது அறியாமை என்று புறக்கணித்து விடுவோம், அந்த வசனத்தைப் பார்ப்போம்.
33:51. அவர்களில் நீர் விரும்பிய வரை ஒதுக்கி வைக்கலாம். நீர் விரும்பியவரை உம்முடன் தங்கவைக்கலாம், நீர் ஒதுக்கி வைத்தவர்களில் நீர் நாடியவரை உம்முடன் சேர்த்துக் கொள்ளலாம். (இதில்) உம்மீது குற்றமில்லை; அவர்களுடைய கண்கள் குளிர்ச்சியடையும் பொருட்டும், அவர்கள் விசனப்படாமல் இருப்பதற்கும் அவர்கள் ஒவ்வொருவரும் நீர் அவர்களுக்கு கொடுப்பதைக் கொண்டு திருப்தி அடைவதற்காகவும், இது சலபமான வழியாகும். மேலும், அல்லாஹ் உங்கள் உள்ளங்களில் இருப்பதை நன்கறிகிறான்; இன்னும் அல்லாஹ் எல்லாம் அறிந்தவன். மிக்க பொறுமையாளன்.

இந்த வசனத்தில் ''நீர் விரும்பியவரை ஒதுக்கி வைக்கலாம்'' என்பதன் பொருள் ''விவாகரத்துச் செய்து விடலாம்'' என்பதில்லை.

''(நபியே! உங்கள் துணைவியரான) அவர்களில் நீங்கள் விரும்பியவர்களை (விரும்பும் காலம்வரை) ஒதுக்கி வைக்கலாம். நீங்கள் விரும்பியவர்களை (விரும்பும் காலம்வரை) உங்களுடன் இருக்க வைக்கலாம். நீங்கள் ஒதுக்கி வைத்தவர்களில் யாரை விரும்புகிறீர்களோ அவர்களை (மறுபடியும்) உங்களுடன் சேர்த்துக்கொள்ளலாம். இதனால் உங்களின் மீது குற்றம் ஏதுமில்லை'' எனும் (திருக்குர்ஆன் 33:51 வது) இறைவசனம் அருளப்பட்ட பிறகும், இறைத்தூதர்(ஸல்) அவர்கள் எங்களில் ஒரு மனைவியின் நாளில் மற்றொரு மனையிடம் செல்ல விரும்பினால், அந்நாளை விட்டுக்கொடுக்கும்படி அனுமதி கேட்பார்கள்'' என்று ஆயிஷா(ரலி) கூறினார். நான், 'அதற்கு நீங்கள் என்ன சொல்வீர்கள்?' என்று கேட்டேன். அதற்கு அவர்கள், 'நான் நபி(ஸல்) அவர்களிடம், 'இறைத்ததூதர் அவர்களே! (வேறொரு மனைவிக்காக என்னுடைய நாளை விட்டுக்கொடுக்கும்படி,) நீங்கள் என்னிடம் அனுமதி கேட்பதாயிருந்தால், நான் யாருக்காக வேண்டியும் தங்களைவிட்டுக் கொடுக்க விரும்பமாட்டேன்' என்று சொல்வேன்'' என்றார்கள். (முஆதா பின்த் அப்துல்லாஹ் அல்அதவிய்யா (ரலி) புகாரி)

ஒரு மனைவியிடம் செல்ல வேண்டிய நாளில் இன்னொரு மனைவியிடம் செல்வதற்காக அந்த மனைவியிடம் அனுமதி பெறுவதையே அன்றைய தினத்தில் அந்த மனைவியை ஒதுக்கி வைத்தல் என்ற பொருளாகும். ''நான் நபி(ஸல்) அவர்களிடம், 'இறைத்ததூதர் அவர்களே! (வேறொரு மனைவிக்காக என்னுடைய நாளை விட்டுக்கொடுக்கும்படி,) நீங்கள் என்னிடம் அனுமதி கேட்பதாயிருந்தால், நான் யாருக்காக வேண்டியும் தங்களைவிட்டுக் கொடுக்க விரும்பமாட்டேன்'' என்று ஆயிஷா(ரலி) அவர்கள் கூறியதிலிருந்து மனைவியின் சம்மதம் இல்லாமல் அன்றைய தினம் அந்த மனைவியை நபி(ஸல்) அவர்கள் ஒதுக்கவில்லை என்பது தெளிவு. எனவே ''ஒதுக்கி வைக்கலாம்'' என்பதற்கு விவாகரத்தைப் பொருத்தக்கூடாது. விவாகரத்துக்கு மனைவியின் சம்மதம் தேவையில்லை. ''நீங்கள் ஒதுக்கி வைத்தவர்களில் யாரை விரும்புகிறீர்களோ அவர்களை (மறுபடியும்) உங்களுடன் சேர்த்துக்கொள்ளலாம்.'' என்பதால் இது விவாகரத்தைக் குறிக்கவில்லை என்பதை விளங்கலாம். மேலும் நபி(ஸல்) அவர்கள் தமது மனைவி மார்களின் இடத்தில் வேறு மனைவியரை மாற்றிக் கொள்வதையும் - ஒரு மனைவியை மணவிலக்கு செய்து விட்டு அந்த இடத்தில் வேறொரு மனைவியை மணமுடிப்பதை இறைவன் தடை செய்துவிட்டான் - நபி(ஸல்) அவர்கள் தம் மனைவியரில் எவரையும் விவாகரத்துச் செய்வதையும் இறைவன் அனுமதிக்கவில்லை என்பதை 33:32 வசனம் விளக்குகிறது.

33:52. இவர்களுக்குப் பின்னால் உம் வலக்கரம் சொந்தமாக்கிக் கொண்டவர்கள் தவிர இதர பெண்கள் உமக்கு ஹலால் ஆகமாட்டார்கள்; இன்னும் இவர்களுடைய இடத்தில் வேறு மனைவியரை மாற்றிக் கொள்வதும்; அவர்களுடைய அழகு உம்மைக் கவர்ந்த போதிலும் சரியே - ஹலால் இல்லை - மேலும், அல்லாஹ் அனைத்துப் பொருள்களையும் கண்காணிப்பவன்.

நபி(ஸல்) அவர்களின் மனைவிமார்களில் எவரையும் முஸ்லிம்கள் எவரும் திருமணம் செய்ய விலக்கப்பட்டு விட்டதால் நபி(ஸல்) அவர்கள் தம் மனைவியரில் எவரையும் விவாகரத்துச் செய்வதும் தடுக்கப்பட்டது. இதனால் நபி(ஸல்) அவர்களின் மீது அவர்களின் மனைவிமார்களுக்கு உரிமையும் அதிமாகியது.

(இன்னும் வரும்)

Saturday, January 01, 2005

இஸ்லாத்தின் வரலாறும், மாற்றாரின் உளறலும், 2

பனு முஸ்தலிக் போர் நடப்பதற்கு முன்பே முஸ்லிம் பெண்கள் ஆடைகள் பற்றிய ஹிஜாப் சட்டம் நடைமுறையில் இருக்கிறது, அதாவது பர்தா சட்டம் அமுலுக்கு வந்து விட்டது.

'இஸ்லாத்தில் பர்தா - வரலாறும் நிகழ்வுகளும்' என்று இஸ்லாத்தின் பர்தா வரலாறை எழுதப் புகுந்தவர் வரலாற்றை அபத்தமாக்கியிருக்கிறார். இஸ்லாத்தின் வரலாறும், மாற்றாரின் உளறலும் என்ற பதிவில் அன்னை ஆயிஷா(ரலி) அவர்களின் மீது அவதூறு கூறியது சம்மந்தமாக நாம் முன் வைத்த நீண்ட ஹதீஸில்...

(இவ்வாறே அவர்கள் தாம் மேற்கொண்ட (பனூ முஸ்தலிக் என்ற) ஒரு போரின்போது எங்களிடையே சீட்டுக் குலுக்கிப் போட்டார்கள். அதில் என்னுடைய (பெயருள்ள) சீட்டு வந்தது. எனவே, நான் இறைத்தூதர்(ஸல்) அவர்களுடன் (பயணம்) புறப்பட்டுச் சென்றேன். (இது பெண்கள் கடைப்பிடிக்க வேண்டிய பர்தா எனும்) ஹிஜாபின் சட்டம் அருளப்பட்ட பிறகு நடந்ததாகும்.

2.(படை சென்றதற்குப் பின்னால் (படையினர் முகாமிட்ட இடத்தில் தவறவிட்டுச் சென்ற பொருள்களை எடுத்துச் செல்வதற்காக) ஸஃப்வான் இப்னு முஅத்தல் அஸ்ஸுலமி அத்தக்வானீ என்பவர் இரவின் பிற்பகுதியில் புறப்பட்டு நான் தங்கியிருந்த இடத்திற்கு அருகில் அதிகாலையில் (தவறவிடப்பட்ட பொருள்களைத் தேடுவதற்காக) வந்து சேர்ந்தார்.அவர் (அங்கே) தூங்கிக்கொண்டிருந்த ஒரு மனிதனின் உருவத்தை (என்னை)ப் பார்த்தார். எனவே, என்னிடம் வந்தார். என்னைப் பார்த்ததும் அவர் அடையாளமும் கண்டுகொண்டார். பர்தாவுடைய சட்டம் அருளப்படுவதற்கு முன்னர் அவர் என்னைப் பார்த்திருந்தார். அவர் என்னை அறிந்துகொண்டு 'இன்னாலில்லாஹி வஇன்னா இலைஹி ராஜிஊன்' (நாம் அல்லாஹ்வுக்கே உரியவர்கள். மேலும், நாம் அவனிடமே திரும்பிச் செல்லவிருக்கிறோம்) என்று அவர் கூறிய சப்தத்தைக் கேட்டு நான் கண்விழித்தேன். உடனே (உறக்கத்தில்) விலகியிருந்த) என்னுடைய மேலங்கியால் முகத்தை மறைத்துக் கொண்டேன்.

அன்னை ஆயிஷா(ரலி) அவர்களின் மேற்காணும் செய்தியிலிருந்து அந்நூர் அத்தியாயத்தின் 31வது வசனம், அஹ்ஜாப் அத்தியாயத்தின் 59வது வசனம் ஆகிய இந்த இரண்டு வசனங்களும் பனு முஸ்தலிக் போர் நிகழ்வுக்கு முன்பே அருளப்பட்டது என்பது தெளிவு. ஆனால் எதிரிகள் இஸ்லாத்தின் வரலாற்றை தலைகீழாகப் புரட்டுகிறார்கள். 24:31 வசனம் அருளப்பட்ட வரலாற்றுப் பின்னணியை விளக்கப் புகுந்தவர் கூறுவதைக் கேளுங்கள்!

//இந்த வசனம் அருளப் பட்டதன் பிண்ணனியைப் அறிவது, இந்த வசனத்தை முறையாக புரிந்துகொள்ள உதவியாக இருக்கும். முகமது நபியவர்கள் மதீனாவுக்கு இடம் பெயர்ந்து, சுற்றி இருந்தவர்களுடன் போரிட்டுக் கொண்டிருந்த காலம் அது(ஆறாம் ஆண்டு என இஸ்லாமிய வரலாற்றறிஞர்களுள் சிலர் கருதுகின்றனர்). அப்போது பனி அல் முஸ்தாலிக் ஜாதியினருடன் சண்டையிட்டு, அவர்களது உடமைகளை கைப்பற்றி வெற்றிகொண்டபோது திடீரென மக்காநகர முஸ்லீம்களுக்கும் (முஹாஜிர்), மதீனா வாசிகளுக்கும் (அன்சாரிகள்) உரசல் ஏற்பட்டது. இதைத் தொடர்ந்து, மதீனாவுக்கு திரும்பியவுடன் முஹாஜிர்கள் விரட்டப் படுவார்கள் என்று அன்சாரிகளுள் சிலர் மிரட்டல் விடுத்தனர். இதனை கேள்விப்பட்ட முகமது நபி அவர்கள், இந்தச் சூழலை தவிர்ப்பதற்காக இரவோடிரவாக மதீனாவுக்கு திரும்ப முடிவெடுத்தார்.//

இஸ்லாத்தின் மீது உள்ள காழ்ப்புணர்ச்சியால், ஏற்கெனவே அருளப்பட்ட வசனத்தை தம் கதைக்கு தோதாக மீண்டும் அருளப்பட்டதாக துணிந்து பொய் சொல்கிறார்.

மேலும் 24:31 வசனத்தை அவர் ஆய்வுக்கு எடுத்துக்கொள்ளத் துவங்கும் முன்பும் அந்த வசனம் முஹம்மது நபி(ஸல்) அவர்களின் மனைவிகள் குறித்து மட்டுமே சொல்லப்பட்டவைதாம் என்றும் தப்பாக அடம்பிடிக்கிறார்.

//இது போன்றே வசனங்கள் 33:53,33:55 ஆகியவை, மற்ற ஆண்கள் முகமது நபியவர்களின் வீட்டுக்குள் செல்வதையும் (அக்காலத்தில், நபியவர்களின் வீடும் மசூதியும் சேர்ந்தே இருந்தது), அவரது மனைவிகளிடம் பேசுவதையும் தடை செய்தன. ரூமி, இந்தப் பிண்ணனி பற்றி எங்குமே குறிப்பிடவில்லை. மேலும், இந்த அத்தியாயத்தைத் தவிர, இன்னொரு இடத்தில் திருக்குரானில் பெண்கள் ஆடைகளை ஒழுங்காக அணிந்து கொள்வது பற்றி வருகிறது. அது, சூரா அந்நூர் என்கின்ற இருபத்தினான்காவது அத்தியாயம் ஆகும். அந்த திருக்குரான் வசனங்களுமே, இப்படிப் பட்ட ஒரு இக்கட்டான சூழலிலேயே அல்லாஹ்வினால் அருளப் பட்டன. அவையும், முகமது நபிகளின் மனைவிகளைக் குறித்தே சொல்லப் பட்டவைதாம். அதாவது, சீசரின் மனைவி சந்தேகத்துக்கு அப்பாற்பட்டவளாக இருக்க வேண்டும் என்பது போல, முகமது நபியவர்களின் மனைவிகள் எந்தவித குற்றச் சாட்டுகளுக்கும் ஆளாகிவிடக் கூடாது என்ற கவலையும், அவர்கள் வேறு யாரையும் மணந்து கொள்ளக் கூடாது என்பதுமே இந்த வசனங்களின் நோக்கமாக இருந்திருக்கிறது.//

24:31 " இன்னும் முஃமினான பெண்களுக்கும் நீர் கூறுவீராக: அவர்கள் தங்கள் பார்வைகளைத் தாழ்த்திக் கொள்ள வேண்டும் தங்கள் வெட்கத் தலங்களைப் பேணிக்காத்துக் கொள்ள வேண்டும் தங்கள் அழகலங்காரத்தை அதினின்று (சாதாரணமாக வெளியில்) தெரியக் கூடியதைத் தவிர (வேறு எதையும்) வெளிக் காட்டலாகாது. இன்னும் தங்கள் முன்தானைகளால் அவர்கள் தங்கள் மார்புகளை மறைத்துக் கொள்ள வேண்டும் மேலும், (முஃமினான பெண்கள்) தம் கணவர்கள், அல்லது தம் தந்தையர்கள், அல்லது தம் கணவர்களின் தந்தையர்கள் அல்லது தம் புதல்வர்கள் அல்லது தம் கணவர்களின் புதல்வர்கள், அல்லது தம் சகோதரர்கள் அல்லது தம் சகோதரர்களின் புதல்வர்கள், அல்லது தம் சகோதரிகளின் புதல்வர்கள், அல்லது தங்கள் பெண்கள், அல்லது தம் வலக்கரங்கள் சொந்தமாக்கிக் கொண்டவர்கள், அல்லது ஆடவர்களில் தம்மை அண்டி வாழும் (பெண்களை விரும்ப முடியாத அளவு வயதானவர்கள்) பெண்களின் மறைவான அங்கங்களைப் பற்றி அறிந்து கொள்ளாத சிறுவர்கள் ஆகிய இவர்களைத் தவிர, (வேறு ஆண்களுக்குத்) தங்களுடைய அழகலங்காரத்தை வெளிப்படுத்தக் கூடாது மேலும், தாங்கள் மறைத்து வைக்கும் அழகலங்காரத்திலிருந்து வெளிப்படுமாறு தங்கள் கால்களை (பூமியில்) தட்டி நடக்க வேண்டாம் மேலும், முஃமின்களே! (இதில் உங்களிடம் ஏதேனும் தவறு நேரிட்டிருப்பின்,) நீங்கள் தவ்பா செய்து (பிழை பொறுக்கத் தேடி), நீங்கள் வெற்றி பெறும் பொருட்டு, நீங்கள் அனைவரும் அல்லாஹ்வின் பக்கம் திரும்புங்கள்."

24:31, 33:59 ஆகிய இரு வசனங்களும் வேறு சமயத்தில் அருளப்பட்டவை. இவ்விரு வசனங்கள் மட்டும்தான் முஸ்லிம் பெண்களின் ஆடைகளைப் பற்றி பேசுகின்றன. இவ்விரு வசனங்களைப் பற்றி பார்ப்பதற்கு முன் முஹம்மது நபி(ஸல்) அவர்களை இறைத்தூதராக நியமிக்கப்படுவதற்கு முன்பும், நியமிக்கப்பட்ட ஆரம்பக் கட்டங்களிலும் அறியாமை காலத்து அரபு மக்களிடம் மலிந்து கிடந்த மூடநம்பிக்கைகள விட்டு விடுவோம், அவர்களின் குடும்ப வாழ்க்கை எவ்வாறு இருந்தது என்பதை சுருக்கமாக அறிந்து கொள்வது அவசியமாகிறது.

அறியாமைக் காலத் திருமணங்கள் நான்கு வகைகளில் நடந்தன.
1. ஒரு ஆண்மகன் பெண் பேசி அவளுக்கு மஹர் கொடுத்து மணந்து கொள்வது.

2. ஒருவனுக்கு தனது மனைவி மூலம் குழந்தை ஏதும் உருவாகா விட்டால், அவளது மாதவிடாய் நின்றவுடன் இன்னொருவனிடம் அனுப்பி வைப்பான். அந்த இன்னொருவன் மூலம் அவள் கருவுறும் வரை கணவன் அவளைத் தீண்ட மாட்டான் அவள் கருவுற்றது தெரிந்ததும் அவளைத் திண்டுவான். இதுவும் திருமணம் என்றே கூறப்பட்டது.

3. பத்துக்கும் குறைவான ஆண்கள் ஒரு பெண்ணிடம் சென்று அத்தனை பேரும் அவளுடன் உடலுறவு கொள்வார்கள். அவள் கருவுற்று, குழந்தை பெற்று சில நாட்கள் கழிந்ததும் அவள் அவர்களை அழைப்பாள். அவர்களில் யாரும் மறுக்காமல் வந்து விடுவார்கள். 'உங்களுடன் நடந்த உறவினால் நான் குழந்தை பெற்று விட்டேன்' என்று அவர்களிடம் கூறி விட்டு அவள் விரும்பிய ஒருவனைக் குறிப்பிட்டு 'இது உன் குழந்தையே" என்பாள் அக்குழந்தை அவனுக்கு உரியதாகக் கருதப்படும்.

4. யார் வேண்டுமானாலும் வரலாம் என்று நடந்து கொண்ட விபச்சாரிகளும் இருந்தனர். அவர்களின் வாசல்களில் கொடிகளை நட்டு வைப்பார்கள். அது அடையாளமாகத் திகழ்ந்தது. அவள் கருவுற்று குழந்தைப் பெற்றால் அனைவரும் அவளிடம் வருவார்கள். ரேகை நிபுணர்கள்(?) அழைக்கப்படுவார்கள். குழந்தையின் ரேகை யாருடைய ரேகையுடன் ஒத்திருந்ததோ அவனுக்குரியதாக அக்குழந்தை கருதப்பட்டு விடும். (அபூ தாவூத்)

விபச்சாரம் சர்வ சாதாரணமாக அவர்களிடையே நடந்து வந்தது, அதற்கு சமூக அங்கீகாரம் கிடைத்ததையும் இந்தச் செய்தியிலிருந்து நாம் அறியலாம்.
'அல்லாஹ்வின் தூதரே! இந்தப் பையன் என் மகனாவான், நான் இவளது தாயுடன் விபச்சாரம்'' செய்துள்ளேன் என்று ஒரு மனிதர் நபி(ஸல்) அவர்களிடம் கேட்டார். ''இத்தகைய கோரிக்கைக்கு இஸ்லாத்தில் இடமில்லை'' என்று நபி(ஸல்) அவர்கள் மறுத்து விட்டனர். (அபூ தாவூத்)

இந்த நிகழ்ச்சியும் அவர்களின் தரங்கெட்ட வாழ்க்கையை அடயாளம் காட்டுகிறது.

திருமணம் செய்ய எந்த விதமான கட்டுப்பாட்டையும் அவர்கள் வைத்திருக்கவில்லை. கணக்ககின்றி பெண்களை மணந்து கொள்வதை அந்தச் சமுதாயம் அங்கீகரித்து வந்தது.

ஒருவர் இஸ்லாத்தை ஏற்கும் போது அவருக்கு பத்து மனைவிகள் இருந்ததாகவும், நான்கைத் தவிர மற்றவர்களை விவாக விலக்குச் செய்யுமாறு நபி (ஸல்) அவர்கள் கூறினார்கள்.

ஒருவன் தன் மனைவியை விவாகரத்துச் செய்தால், அல்லது அவன் இறந்து விட்டால் அவனது மனைவியை அவனது மகனே மணந்து கொள்ள அந்தச் சமுதாயத்தில் அனுமதி இருந்தது. இது பரவலாக நடைபெற்றும் வந்தது.

'உங்கள் தந்தையர் மணந்து கொண்டவர்களை நீங்கள் மணக்கக் கூடாது' (அல்குர்அன் 4:22) என்ற கட்டளை மூலம் இதனை அறியலாம்.

அன்றைய அரபு மக்களின் வாழ்க்கை நாகரீகக் கலாச்சாரம் இப்படியாகத்தான் இருந்தது. இனி 24:31 வசனம் அருளப்பட்ட போது,

''(நபியே! இறைநம்பிக்கை கொண்ட பெண்களிடம் கூறுக:) அவர்கள் தங்களின் மார்புகள் மேல் தங்களின் முந்தானையைப் போட்டு (மறைத்து)க் கொள்ளட்டும்'' எனும் (திருக்குர்ஆன் 24:31 வது) வசனம் அருளப்பட்டபோது பெண்கள் தங்கள் கீழ் ஆடைகளில் ஓரத்தைக் கிழித்து அதனை முந்தானையாக ஆக்கி (மறைத்து)க் கொண்டார்கள். (ஸஃபிய்யா பின்த் ஷைபா(ரலி) (புகாரி)

ஆரம்ப கால முஹாஜிர் பெண்களுக்கு அல்லாஹ் கருணை புரிவானாக! '(நபியே! இறைநம்பிக்கை கொண்ட பெண்களிடம் கூறுக:) அவர்கள் தங்கள் மார்புக்கு மேல் தங்களின் முந்தானையைப் போட்டு (மறைத்து)க் கொள்ளட்டும்!'' எனும் (திருக்குர்ஆன் 24:31 வது) வசனத்தை அல்லாஹ் அருளியபோது, அவர்கள் தங்கள் கீழ்ஆடை(யில் ஒரு பகுதி)யைக் கிழித்து அதனை முந்தானையாக ஆக்கி (மறைத்து)க் கொண்டார்கள். (அன்னை ஆயிஷா(ரலி) (புகாரி)

இந்த வசனம் அருளப்படுவதற்கு முன் அன்றைய பெண்கள் மாராப்பு, முந்தானை அணிந்திருக்கவில்லை என்பதும், இந்த வசனம் அருளப்பட்ட செய்தி கிடைத்தவுடன் தங்களிடம் மேலதிமாக துணி இல்லை என்ற நிலையிலும் கீழாடையில் ஒரு பகுதியைக் கிழித்து மாராப்பாக்கிக் கொண்டார்கள் என்பதையும் விளங்கலாம்.

இன்று நடைமுறையில் இருக்கும் முஸ்லிம் பெண்களின் 'மேலங்கி' ஆடை பர்தா முறையை ''முஸ்லிம்கள் மதச் சின்னமாக்குகிறார்கள்'' என்று ஒப்பாரி வைப்பவர்கள் மேற்கண்ட இரு ஹதீஸ்களையும் படித்து சிந்திக்கட்டும். இன்றைய பர்தா முறை நபி(ஸல்) அவர்களின் காலத்துப் பெண்களிடம் இருக்கவில்லை என்பதை உணரட்டும். அங்கங்கள் தான் மறைக்கப்பட வேண்டும் என்று இறைவன் கூறுகிறானே தவிர குறிப்பிட்ட முறையில் தைக்கப்பட்ட ஆடைகளால்தான் மறைக்க வேண்டுமெனக் கூறவில்லை. என்பதை கவனத்தில் கொள்ளவும்.

(இன்னும் வரும்)